Ronaldo-a'n goal a khung zel

Thawhlehni zan khan Cristiano Ronaldo telna Al-Nassr chuan Al-Adalah khelmual Prince Abdullah Bin Jalawi Stadium an luhchhuah a, 5-0 in hnehna an chang. Portuguese forward Ronaldo hian goal hnih a khung bakah Talisca-a'n goal hnih a khung a, Ayman Yahya-a'n goal khat a khung ve bawk.

Kum 38 mi Ronaldo hian international break laiin Portugal tan match hnihah goal li a khung a, Al-Adalah lakah goal hnih khung lehnghalin match hnuhnung pathumah goal hnih vek a khung.

Ronaldo hian a football career-ah goal 834 a khung tawh a, a ropuizia nemnghettu chu goal khungtu ropui pahnih Thierry Henry leh Ronaldo Nazario te goal khung belhkhawm aiin Manchester United forward hlui hian a khung tam zawk.

Arsenal legend Henry hian a inkhelh hun chhungin club leh ram tan goal 417 a khung a, FIFA World Cup nomawi vawi hnih chawi tawh Brazilian striker Ronaldo hian club leh ram tan goal 414 a khung ve bawk. Striker ṭha pahnih goal khung zat belhkhawm hi 831 niin Cristiano Ronaldo-a'n a khung tam zawk.

Cristiano Ronaldo ropuina hi chu a daih reina hi a ni a, a inkhelh ṭantirh laia Brazilian Ronaldo a awm avanga C. Ronaldo tih kher ngai kha tunah chuan Ronaldo tih ringawta ziah pawhin a koh tum a chiang em em tawh a ni.