Match riat khel thei lo turin referee namtu Mitrovic an hrem
Fulham striker Aleksandar Mitrovic chu FA Cup-a Man-chester United an hneh loh ṭuma referee Chris Kavanagh a nam avangin FA chuan match riat khel thei lo turin an hrem a, £75,000 chawitir a ni bawk.
Fulham manager Marco Silva pawh FA Cup quarterfinal-ah hian hnawhchhuah a ni a, ani pawh match hnih chhung atan hrem a ni bawk. Silva chuan kar liam ta khan Old Trafford-a an chet dan avanga a inchhir thu a lo sawi tawh a ni.
FA Cup-ah hian Fulham hi Man United lakah chak thei dinhmunah an ding a, amaherawhchu Willian-a'n penalty a chawi hnuah Brazilian midfielder bakah Mitrovic leh manager Silva te hnawhchhuah an ni a, Erik Ten Hag-a hote 3-1 in an chak ta zawk.
Mitrovic chuan, "Ka thil tih kha pawi ka ti a, ka thinurna ka inhnehtir a ni. Ka lungawi lohna ka lanchhuahtir dan kha a dik lo," tiin a inthiam loh thu a sawi. Fulham hi an player-te an thunun theih loh avangin £40,000 chawitir an ni bawk.
Premier League-ah player-te hi an che mawi lo emaw dan an zawm lo emaw a nih chuan FA-in hremna an lekkawh an hreh lo. Tun ṭumah hian hremna na zual 10 rawn chhawpchhuah a ni.
1. Eric Cantona (Thla kua)
Kum 1995 khan Eric Cantona chuan amah au eltu Crystal Palace ṭantu pakhat chu a tlawh (kungfu kick). FA chuan Manchester United forward hi thla kaw chhung khel thei lo turin a hrem a, £30,000 chawitir a nih bakah khawtlang tan darkar 120 chhung hna a thawk bawk.
2. Mark Bosnich (Thla kua)
April 2003 khan Australian keeper Mark Bosnich chu cocaine a hman avangin thla kaw chhung hrem a ni a, a club khelhna Chelsea-in a contract an titawp bawk.
3. Rio Ferdinand (Thla riat)
December 2003 khan Manchester United defender Rio Ferdinand chu September 2003-a drug test huna a inlan loh avangin thla riat chhung an hrem.
Ferdinand chuan a bazar vanga test hun theihnghilh a nih thu a sawi a, FA chuan English defender thusawi hi pawm loin an hrem ta tho a, January 2004 aṭangin an hrem ṭan.
4. Adrian Mutu (Thla sarih)
Kum 2004 khan Andrian Mutu chu cocaine a ti tih hmuhchhuah a nih avangin FA chuan thla sarih chhung a hrem a, £20,000 chawitir a nih bakah a club khelhna Chelsea-in an ban bawk.
Romanian forward Mutu hi English football-ah hmuh tur a awm zui lo. Kum 2010-ah Mutu hi Fiorentina tana a khelh laiin damdawi chi khat 'anti-obesity pills' hman vangin thla ruk chhung hrem a ni leh bawk.
Chelsea hian Mutu hi August 2003 khan pound maktaduai 16-in an lalut a, London club nen hian hun rei tak court-a an inbeih hnuah damdawi hman phal loh a hman avanga thiam loh changin pound maktaduai 15.2 chawitir a ni.
5. Joey Barton (Match 12)
Sergio Aguero-a'n Premier League history-a goal hlu ber ang hiala chhal theih a thun ṭum khan Joey Barton chuan 1-1 a nih laiin a club hlui Man City forward Carlos Tevez chu a nghawk lui. QPR player Barton hian red card a hmuh hnuah Sergio Aguero ke a pet a, Vincent Kompany chu a luin tauh a tum leh bawk. QPR hi 3-2 in chak lo mah se Premier League khel turin an him hlauh.
Barton erawh a chet dan avangin match 12 khel thei lo tura hrem a ni a, £75,000 chawi tura hrem a ni. QPR pawhin Barton hi kar ruk hlawh an chawitir a, Marseille-ah loan-in an chhuahtir zui bawk.
6. Paolo Di Canio (Match 11)
Kum 1998 khan Sheffield Wednesday forward Paulo Di Canio chuan referee Paul Alcock a nam thlu a, match 11 khel thei lo tura hrem a nih bakah £10,000 chawitir a ni. Italian forward hian thla thum hnuah West Ham a zawm a, Arsenal nena an inkhelh ṭum hi Sheffield tana a khelh hnuhnun ber a ni.
7. Luis Suarez (Match 10)
World Cup 2014-a thil thleng kha khawvelin an hre reng tawh ang. Uruguayan forward Luis Suarez chuan Italy defender Giorgio Chiellini a seh a, FIFA-in football kaihhnawiha tel thei lo turin thla li chhung a hrem. Suarez hian Ajax tana a khelh laiin kum 2010 khan PSV midfielder Otman Bakkal chu a seh tawh a, Premier League a khelh hnuah pawh a la bansan lo.
Liverpool tana a khelh laiin Suarez hian Chelsea defender Branislav Ivanovic chu a banah a seh. Uruguayan forward hian a tihsual hi pawm mah se a zirchiangtu mi pathum awmna panel chuan Suarez hian a tihsual pawizia hi a hre tawk loah an ngai a, match 10 khel khel turin an hrem.
8. David Prutton (Match 10)
Southamtpon midfielder David Prutton kha tun ṭuma Mitrovic an hremna chhan vang tho hian match 10 hrem a lo ni tawh. Prutton hian Arsenal winger Robert Pires chu a tlawh avangin yellow card vawi hnihna hmuin hnawhchhuah a ni a, foul hmutu hi assistant referee Paul Norman a ni.
Saints midfielder Prutton chuan Norman khawih a tumna lamah referee Alan Wiley chu ṭum hnih ngawt a nam a, match 10 bakah £6,000 chawitir a ni. Tunah chuan Prutton hi Sky Sports-ah commentator hna a chelh mek.
9. Luis Suarez (Match 8)
Luis Suarez hi goal khungtu ropui tia sawi theih ni mah se khelmualah hian vawi khat aia tam a mualpho. Uruguayan striker hian October 15, 2011-a Manchester United nen 1-1 a an inhnehtawk ṭumin Patrice Evra lakah vun rawng inhmusitna ṭawngkam a chhak chhuak.
Suarez hian thiam thu sawi mah se match riat bakah £40,000 chawi tura hrem a ni. February thlaah Man United leh Liverpool hi an inkhel leh a, Suarez hian Evra hi a chibai duh lo.
10. Ben Thatcher (Match 8)
Manchester City left back Ben Thatcher chuan Portsmouth midfielder Pedro Mendes chu a nghawk lui a, thil thlen hunlai hian yellow card chauh pek a ni.
Mendes hi oxygen pek ngaia zawn chhuah a ni thung. FA-in thil thlen dan an ennawn hnuah match riat atan an hrem a, thla ruk hlawh an chawitir bawk.