Anfield-ah Arsenal fiahna

Premier League hmahruaitu Arsenal hi champion turin an ṭha tawk em, tih chu fiah a ni dawn. Pathianni zan dar 9:00 hian mikhual tana inkhelh harsatna hmun Liverpool khelmual Anfield-ah an lut dawn.

Football pundit Gary Neville chuan, "Anfield-ah an chak thei a nih chuan Arsenal hi an champion ang, an chak lo a nih chuan champion tur sawi a har khawp ang," a ti. Gunners tan chuan season kal laia an tana fiahna pawimawh ber anga sawi theih a ni.

Anfield boruak

Jurgen Klopp-a'n beisei angin Liverpool a chet ṭhatpui rih lo, German manager hian a sulhnu vanga Reds la enkawl mai nia a inhriat thu a sawi hial a nih kha. Mahse, an che ṭha lo kan tih rual hian Anfield boruak erawh a la ṭihbaiawm reng.

Klopp hian Anfield-ah league match khel tura Arsenal a mikhual hnuhnung parukah hnehna a chang vek! Borussia Dortmund a enkawl lai khan a zawnin Werder Bremen chu vawi sarih a lo hneh tawh, a record ṭha tak nihrual turin match khat a la ngai.

Liverpool manager Klopp chuan, "Kan nihna ang nei let turin hun ṭha kan nei a, chumi atan chuan Anfield kan mamawh bawk. Anfield hi a la pangngai reng a, a hlutna leh kan hmasawnna chu kan lantir tur a ni ang," a ti.

Tun season Premier League match bikah chuan Leeds United chauh hi Anfield aṭanga point thum hawn thei an la ni - Arsenal tan pawh hian a awlsam dawn lo tih chu thil chiang a ni a, club lian hmachhawn thiam Reds lakah an fimkhur a ngai ang.

Klopp hian Chelsea an hmachhawn ṭumin a player ṭha ṭhenkhat - Mohamed Salah, Cody Gakpo, Trent Alexander-Arnold leh Andrew Robertson te chu bench lamah a dah a, defender pawimawh Virgil van Dijk chu hliam vangin a inlan thei lo bawk.

Tunah chuan Van Dijk bakah Luis Diaz leh Thiago ten training an zawm pangngai tawh. Liverpool manager hian Blues nen an inkhelh leh Arsenal an hmachhawn inkarah training pangngai vawi khat chiah an neih hman thu a sawi.

Klopp chuan, "Arsenal hmachhawn tur chu training-na lama an chet dan milin ka thlang ang," a ti a, tumah inkhel bul ṭan tura chiangsa an awm bik lo tihna a ni. A tir aṭanga khel tur chuan Klopp lungawina zana training an beih a ngai.

Arsenal thar chu

Mikel Arteta-a'n zawimuangin team a din a, tunah chuan Premier League champion lai Manchester City chunga awm thei an ni mek. Spanish manager-in a Gunners a din chhoh dan hi Klopp pawhin a lo hmuh hmaih lo chiang hle.

Klopp chuan, "Tunah chuan nasa takin an danglam tawh. Mikel hoin football level sang tak an khel, an mamawh tak player an lalut ṭha bawk. Team nghelnghet tak an nihzia chu tuna an awmna hian a tifiah," a ti. Fak viau mah se an ṭhat tawk lohna lai erawh a hmu chiang tho ang.

Tun hnai an match pahnihah defender William Saliba chu hliam vangin a inlan thei lo. Saliba hmun ruakah Rob Holding a ding ṭhin - English defender hi a tlan chak tawk lo deuh a, hei hi Reds forward tlan chak rual ten an hre ranin a rinawm.

Chutihrualin a laia ding pakhat zawk Gabriel erawh tun season EPL defender ṭha berte zinga mi a ni a, a sira awm Ben White leh Oleksandr Zinchenko te an rintlak, match dang aiin Zinchenko erawh a fimkhur a ngai dawn - Salah a hmachawn dawn tlat.

Tun ṭum hi Leandro Trossard an neih china Arsenal tlarhma an inpeih kim vawi khatna a ni dawn. Gabriel Jesus, Bukayo Saka leh Gabriel Martinelli te tan Trossard hian inelna hautsak a chhawp chhuahsak a, tu ber nge khel ang tih hriat a harsa.

Leeds laka Saka-a'n bul a ṭan loh chhan kha England tana match hnih a khelh zawn vang a ni a - Reds an hmachhawn dawn avanga indahṭhatna a ni tel bawk. A dam ṭha a nih phawt chuan Saka chu bul ṭan chiang tur a ni ang.

Jesus leh Martinelli te hi Trossard-a'n a khelhpui thei - Saka pawh a khelhpui thei. Khelmual chhunga a chet dan thlirin Trossard hi dah chhuah ngawt tur niin a lang lo. Season tir lam khan Trossard hian Anfield-ah Brighton kawr hain hattrick a lo siam tawh, a ṭha zawngin Arteta lu a hai ang.