National Group Stage khel tur Chawnpui leh Chanmari

Reliance Foundation buatsaih Developmental League chu Ningani khan Aizawl bikah khelh zawh a ni a, pakhatna dinhmun hauhtu Chawnpui FC leh Chanmari FC te National Group Stage khel turin an tling.

Mizoram zone bik hi RG Stadium-ah khelh a ni a, March 15 aṭang khan khleh ṭan niin April 6, Ningani khan an zo. Match tawp berah hian Chanmari FC-in 1-0 in hmahruaitu Chawnpui FC an hneh.

Inelnaah hian team paruk Chawnpui FC, Chanmari FC, Ramthar Veng FC, SYS Football Club, 1st Bn MAP leh Chanmari West FC te chu vawi hnih ṭheuh an inkhel chhuak.

Chawnpui FC leh Chanmari FC te hian point 20 ve ve an hmu a, match tawp berah Chanmari hian hnehna chang mah se an inkhelh hmasak ṭumah Chawnpui hi 3-2 in an chak. Head to head a en theih tak loh avangin a pumpui goal difference en a ni a, coach Lalsangzuala Hmar enkawl Chawnpui a chung berah an awm.

Developmental League-ah hian India ram chu zone kua - Mizoram, Meghalaya - Assam, Manipur, East Zone, Kerala Zone, Goa Zone, South Zone, West Zone leh North Zone-ah te ṭhen hran an ni.

Group stage-ah hian zone tina ti ṭha pahnih bakah pathumna ti ṭha pahnih an tel dawn a, Mizoram zone-a pathumna Ramthar Veng FC pawhin point 19 ngawt an hmuh avangin National Group Stage khel thei dinhmunah an la ding.

National Group Stage-ah hian team 20 chu group paliah panga zela ṭhen darh an ni ang a, group tina champion hian NextGen Cup an khel dawn. Nikum khan NextGen Cup-ah Premier League club Tottenham Hotspur, West Ham United, Leicester City, Nottingham Forest leh Crystal Palace rawltharte an rawn kal a ni.