Hero Super Cup; ISL club Hyderabad hmaah Aizawl FC
Aizawl FC chuan Indian Super League club an hmachhawn theih nan April 6, Ningani zan khan NorthEast Derby-ah Trau 1-0 in an hneh a, goal awmchhun hi Belarusian striker Ivan Veras-a'n minute 64-naa a khung a ni. Mizo club hian Trau an hneh avangin Hero Super Cup-ah group stage an lut a, ISL club Hyderabad, Odisha leh East Bengal te nen group khatah an awm.
April 9, Pathianni tlai dar 5:00 hian Aizawl FC-in Manjeri Payyanad Stadium-ah ISL club Hyderabad an hmachhawn dawn. Group khatah team pali zel an awm a, a sang ber chauhin semifinal an khelh dawn avangin champion tum tan match khat chetsual pawh a pawi thei ang.
Trau hnehtu AFC
Aizawl FC hi I League khelh zawh takah khan pasarihna niin season an khar a, Hero Super Cup hi second qualifying round aṭangin an khel ṭan. Mizo club hian I League-a palina Trau an hmachhawn a, team pahnih an inngam ve ve avangin inkhel a nung hle.
Victor Lalbiakmawia kaihhruai team hi an che ṭha hret a, mual sir aṭanga an ball vawrh luh chu David Lalhlansanga leh Ivan Veras ten an hmang ṭangkai thei tawk lo. Second half-ah Chhantea Sailo a rawn lut a, Armed Veng tlangval ball pet hi Trau keeper Jedidi Haokip-a'n dang perin defender clear ṭhat tawk loh chu minute 64-naah Veras-a'n goal-ah a chantir.
Mizo club hian defender lai pathum an chhawr a, Lalchhawnkima chuan hmun pawimawh changin second half ṭan chiahah Nigerian defender Emmanuel Makinde aiah Lalmuanawma (Munez) an luhtir. Aizawl FC tlarhnung an che ṭha a, an goal neih humhimin 1-0 in an chak
Hmabak Hyderabad
April 9, Pathianni tlai dar 5:00 hian Aizawl FC-in ISL hnuhnung bera league round-a pahnihna ni pha Hyderbad an hmachhawn dawn a, hmabak a harsa dawn. AFC coach Victor-a chuan, "Eng ang team nge kan hmachhawn dawn kan hre lo. Hyderabad team ṭha ber hmachhawn turin kan inpeih a ṭul a ni," tiin a sawi.
Hyderabad hi league round-ah pahnihna ni mah se semifinal-ah ATK Mohun Bagan chu penalty-ah an hneh lo. Super Cup-ah hian ISL-a team nem zawk an kal a nih pawhin Aizawl FC aia squad chhah zawk tur an ni. Victor-a chuan, "Group khat aṭangin pakhat chauh tlang tur a ni a, Hyderabad hi chuan kan team lakah attacking football an khelh ngei ka ring. Counter attack hmanga vuak let dan tur ṭha kan neih a ṭul a ni," tiin Vanglaini a hrilh.