Barcelona-in Benzema an ngam lo!

Copa del Rey semifinal second leg-ah Barcelona-in Karim Benzema an ngam lo a, an hmelma kumhlun Real Madrid lakah 4-0 in an tlawm - nomawi pakhat an beiseina chu tihtawpin a awm leh ta.

Nou Camp-a inkhelah Real tan Karim Benzema chuan hattrick a siam a, Vinicius Junior chuan goal khat a thawh ve bawk. Mahni muala khel Barca-in a chhanletna tur an nei lo a, an mikhual lakah an mualpho.

Santiago Bernabeu-a team pahnih intawn hmasakin Barca hi 1-0 in an lo chak tawh a, Nou Camp-a inkhel tur an nih bawk avangin Catalan club tan awlsam taka chak mai theih tura ngaih a ni.

Mahse, mikhual tlangnel Real-in ngaihdan dang an nei a, an mikhualna ramah goal li ngawt khungin Barca an barakhaih a, Copa del Rey final an lut - inkhel hmasa nena belhkhawmin 4-1 in an chak.

Beiseina

Nou Camp-a first half inkhelah Barca-in inkhel an thunun zawk a, Real Madrid an che hlei thei lo - tun hnaia team pahnih inhmachhawn tawh dan thlir phei chuan Real hi an chak lo ngei dawn niin a lang.

Mahse, first half hun pek belhah Real an vannei. Barca striker Robert Lewandowski-a hun ṭha neih Real keeper Thibaut Courtois-a'n ṭha taka a dansak hnuah mikhual te

am hian counter-attack hmangin Barca an nawr let thut.

Vinicius leh Benzema ten ball an inpek tawn hnuah Brazilian forward-in a hmawr a bawk a, Barca centre back Jules Kounde chuan lo khawih hman mah se a dang chhuak hman lo a, 1-0 a ni.

Santiago Bernabeu-a team pahnih lo inkhelh tawhna result nen 1-1 a ni chiah a, tlawm chunga haw leh mai tura ngaih Real-in beiseina thar nen chawlhlawk an hman theih phah a, an phur thar sawt.

A hming Benzema

Real hian La Liga-ah hmahruaitu Barca um phak turin thilmak an thlentir a ngai tawh a, Spanish Super Cup final-ah Barca an ngam lo bawk - Copa del Rey an kalkawnga lo ding pawh Barca tho an ni a, tun season chu an tan Catalan club an hnawksak takzet.

Mahse, Nilaini zana an inkhelah erawh Real-in Barca hi an kawng daltir reng an tum lo a, champion nomawi an duh tih an khelh dan hmangin an lantir a, a changtupa chu chuai thei lo Karim Benzema a ni.

Second half ṭan aṭanga minute ngana lekah

Nou Camp a reh a, Benzema-a'n Luka Modric siamsak goal-a a chantir vang a ni. French striker kan la hmu dawn chauh!

Minute 58-naah Barca midfielder Franck Kessie chuan ṭul lo takin Vinicius a titlu a, penalty a chawi. A pet turin Benzema a lo pen chhuak a, Barca keeper Marc-Andre ter Stegen rin lohna lamah a chhuih lut.

A tawp kharna

Dinhmun ṭha lo taka Nou Camp lenglut Real kha thawklehkhatah an dinhmun a ṭha zawk ta thut a, minute 60 pawh a tlin hma hauhin Real-in 3-0 in hma an hruai a, chak tur a chiang tawh, tiin a sawi theih.

Heti chung hian Real-in an la duhtawk lo cheu. Hun tawp nan minute 10 a la awm tihah counter-attack hmangin Real-in Barca an nawr a, Vinicius bawkin ball tlan luhpuiin Eric Garcia leh Kounde ven karah Benzema tan a pe.

Kum 35 mi Benzema-a'n a la tar lo tih pholan nana hmangin goal-ah a chantir a, game hnih a zawnin hattrick a siam - kar hmasa khan Real Valladolid lakah hattrick a lo siam tawh a, Nou Camp-ah kum 1963-a Ferenc Puskas hnua Real tana hattrick siam leh thei hmasa ber a ni.

Benzema hi tun season-ah hliam vangin talbuai fo mah se a dam ṭhat erawh chuan Real tan player pawimawh a ni zel a, inelna hrang hranga match 31 a khelhah goal 25 khungin, assist vawi ruk a nei bawk.

Hmabak chu

Real-in Copa del Rey semifinal-ah hnehna an chang a, final-ah Osasuna an hmachhawn dawn - anni hian Thawhlehni zan khan Athletic Bilbao chu 1-1 in an inhnehtawkpui a, first leg-ah 1-0 a hnehna an chan tawh avangin 2-1 in an tlang.

Athletic Bilbao tan hian Inaki Williams chuan

goal hmahruai a khung a, extra time-ah Osasuna tan Pablo Ibanez chuan khungin, mikhual team hi an tlang ta zawk a ni - kum 2005 hnua Cup final an luh leh hmasak ber a ni a, nomawi liantham la chawi ngai lo team hian May 6-ah Real nen final an khel ang.

Real hian zanin dar 12:30-ah league match an khel zui dawn a, Villarreal an mikhual ang. Barcelona erawh Thawhṭanni zanah league match khel turin an inlan leh dawn chauh a, zan dar 12:30-ah Girona an mikhual dawn.

La Liga club langsar dang Atletico Madrid chu Pathianni zan dar 12:30-ah an inlan dawn a, anni hian khualmualah Rayo Vallecano an lenchilh dawn thung a ni.