Match khat atan Juve an hrem

Vun rawng inthliarna hmanga Inter Milan striker Romelu Lukaku an auhel avangin Juventus an hrem. Old Lady hi match khat chhung atan an stadium khar vek loin, hmun ṭhenkhat laiah fans awm thei lo tura hrem an ni.

Coppa Italia semifinal first leg an khelh ṭumin Inter leh Juve hi 1-1 in an inhnehtawk, he inkhelah hian hun tawp dawnah Lukaku chuan an siphurh a sut a, a goal khung a lawm dan uchuak avangin hnawhchhuah a tawk hial.

Inkhel a tawp hnuah pawh buaina a tawp zui mai lo a, player dang pahnih hnawhchhuah an ni bawk. Khelmual chhung boruak a sang a, fans lam boruak pawh a sang lo thei lo, ṭawngkam mawi lo chhak chhuak tawk an lo awm a ni.

Lukaku hian Instagram lamah, "Thil thleng ngai bawk a thleng nawn leh ta, kum 2019 khan he hmunah hian chhaih nawmnah ka lo ni tawh bawk," tiin Allianz Stadium-a thil thleng chungchang a sawi zui.

Massimiliano Allegri enkawl Juventus hian zanin dar 12:15 hian Serie A khel turin Lazio an lenchilh dawn. Old Lady hi point 15 paihsak tawh an nih avangin an tan champion chu sawi loh, a sang zual pali zinga tel thei dinhmunah an la ding thung.