Milwaukee Bucks dinhmun a chiang

NBA playoff an khel dawn tih a chianna a rei tawh a, tunah chuan Milwaukee Bucks chu Eastern Conference hmahruaitu an ni tih a chiang leh ta - Miami Heat pawhin beisei an la nei zel.

Bucks hian Chicago Bulls lakah 105-92 in hnehna an chang, an thiampuipa Giannis Antetokounmpo chu khup hliam vangin an chhawr thei lo a, inkhel tir lamah Khris Middleton a hliam bawk.

An player ṭha pahnih tel lo pawhin Bucks hi an la ṭha tawk viau a, an chak tlang ta tho. Seeded pakhatna nih hi a pawimawh, playoff hi best of seven series a khelh tur a ni dawn, hetah hian Bucks hian an khelmualah match li an khel thei dawn tihna a ni.

Boston Celtics pawhin Toronto Raptors 97-93 a hnehin Bucks hnungah an awm tih a chiang ta bawk. Boston hian tun regular season kal laiah match 55 hnehna an chang a, an chunga awm Bucks hi vawi 58 an chak thung.

Nimin zing inkhelah Miami Heat chuan Philadelphia 76ers 129-101 in an hneh a, play-in khelh kher ngai lo a playoff khelh theih an la inbeisei zel. Eastern Conference-ah Heat hi pasarihna an ni a, an chunga awm Brooklyn Nets aiin match khatin an chak tlem.

Tun kar tawpah NBA regular season hi a zo tawh dawn - Miami leh Nets te hian match hnih ve ve khelh hmabak an la nei. A sang zual paruk hian play-in khelh ngai loin playoff hmun an chang tlang nghal dawn a ni.

Western Conference lamah Phoenix Suns chuan palina dinhmun an luah nghet ta bawk. Suns hian Kevin Durant-a point 29 hmangin Denver Nuggets 119-115 an hneh, quarter hnuhung berah Durant hian point 12 a nei a, an chakna hnar a ni chiang hle.

Chak lo mah se Nuggets hi Western Conference hmahruaitu an ni chiang tawh a, playoff khelh hmabak an nih avangin Suns lakah an player ṭha ṭhenkhat an hawhchawlh tir a, playoff chinah chuan an ṭhat dan berin an inlan leh tawh ang.

Utah Jazz beiseina a tawp thung. Jazz hian an beiseina chhi nung turin chak ngei ngei an ngai a, mahse Oklahoma City Thunder lakah 114-98 in an chak lo, an tan beiseina a thamral zui nghal a ni.