Chelsea-ah ‘Super Frankie’ a kir e

Graham Potter an ban hnuah Chelsea-in coach thar an nei a, a hming chu Frank Lampard a ni - Lampard hian amah aia an thlan Thomas Tuchel thlaktu Graham Potter a thlak ve leh ta a, season tawp thleng Chelsea a enkawl ang.

London club hian Bayern Munich ban hlim Julian Nagelsmann leh Barcelona coach hlui Luis Enrique an be ve ve a, Tottenham Hotspur manager hlui Mauricio Pochettino pawh an be dawn nia sawi a awm bawk.

Blues-in rang taka thutlukna siam an harsat avangin Lampard lam an hawi phawt a, Everton ban tak coach hnuaia tun season an hman chhungin coach nghet tur an zawng reng bawk ang - nipuia coach thar nei thei an la ni tho tihna a ni.

Lampard chuan, "Ka theihna zawng zawng ka hlan dawn a, chumi zawhah chuan enge thleng zel, chu kan la hria ang chu. Hmanhmawh ka tum lo," a ti a, phur luat vanga thil sawi nghal ṭeuh a tum lo.

Thawnthu hlui

Lampard hi January khan Everton chuan a hna aṭangin an ban a, hemi hma hian July 2019 aṭang khan Chelsea hi a lo enkawl tawh bawk - Blues-ah pawh hian an ban a, January 2021 thleng kha London club hi a enkawl hman.

Chelsea hian zanin dar 7:30-ah league match khel turin Wolverhampton Wanderers an lenchilh zui dawn a, Nilaini zan dar 12:30-ah Champions League quarterfinal first leg khel turin Real Madrid an lenchilh zui ang.

Blues hian coach lailawk Roberto di Matteo hoin 2012 khan Champions League nomawi an lo chawi tawh a, Di Matteo hi contract nghet ziahpui zui a ni. Hetihlaia Blues player pawimawh Lampard hian Di Matteo hnathawh ang hi thawkin, a nghetin a cham zui mai ang em, tih zawhna a awm.

Lampard chuan, "Ka thutlukna tur a ni dawn lo a, ka sawi tawh angin, nakina thil awm thei lo sawi lawk vak ka duh lo. Hetiang ang zawhna hi ka dawng ṭeuh dawn tih ka hria a, ka meng ve kar a ni. Mahse, heng zawhnate hi chu dah ṭhain, ka hmaa hna inchhawp hi thlir ka duh a ni," a ti.

Beiseina a sang

Chelsea hian tun season-ah player lakluh nan pound maktaduai 550 chuang ngawt an seng a, heti chung hian Premier League-ah palina Manchester United chu point 14-in an phak lo mek a, table-ah 11-na an ni bawk.

Player a nih laia a thiam bik em avanga 'Super Frankie' hming lem an pek hi coaching khawvelah erawh 'Super' a la tih hleihtheih lo a, engtiang takin nge Chelsea hi a enkawl dawn hriat a châkawm - a neitu lam chuan beiseina an nei sang hle.

Chelsea neitute zinga mi Todd Boehly leh Behdad Eghbali chuan thuchhuah inṭawm siamin, "Club leh fan-te hi season hmabak kan la neih atana kan hmachhawpte chiang taka hmuhtir kan duh.

"Kan theihna chin china hlawhtling taka season hman kan duh a, a tawp kan thlen theihna tura min hruai turin Frank hian kan mamawh engkim a nei a ni," an ti a, hmanni lawka Roman Abramovich-a hnawl hnu kha an ni lam chuan an hmu sang hle.

A harsa lo

Lampard chuan Chelsea-a kir chu a tan thutlukna harsa a nih loh thu sawiin, "He club-a kir leh tur hian inngaihtuah rei a ngai lo. Hei hi ka club a ni a, ka thinlungah hian hmun pawimawh tak an chang a ni," a ti.

Lampard-a'n Chelsea a enkawl hmasak khan transfer bazar-a hrem an nih avanga player an lakluh theih loh lai a ni a, transfer bazar-ah a kut phuarsak a ni chungin, Premier League-ah palina nihpuiin, FA Cup final a hruai thleng bawk.

Mahse, a season hmasa ber zawh nipui transfer-ah pound maktaduai 200 pek niin, tuna Chelsea player zingah Ben Chilwell leh Kai Havertz te chu a lakluh zingah an tel. Mahse, beisei an phak lo zui a, a match hnuhnung pariata vawi hnih chiah an chak avangin ban a ni a, ban a nih lai hian Premier League-ah pakuana an ni.

Lampard hi Thomas Tuchel chuan thlakin, German coach hian a season hmasa berah Champions League nomawi a chawi nghal. Lampard erawh January 2022 khan Everton-ah a kal a, relegation zone aṭangin a season hmasa berah chhanhim mah se tun season-ah league match 12-ah vawi kua an tlawm avangin ban a ni a, Chelsea boss a ni leh ta.

A chhan

Lampard hian Chelsea leh Liverpool inkhel kha a hmunah a en a, kha inkhelah khan Bruno Saltor chuan coach lailawk hna a chelh - Blues-in an ban hnua Stamford Bridge-a Chelsea inkhel en tura a kal leh hmasak ber a ni a, hetihlai hian Lampard te hi an la indawr lo niin an sawi.

Chelsea boss hi Ashley Cole, Joe Edwards leh Chris Jones te chuan Stamford Bridge-ah hian coaching staff niin an zawm ve leh dawn a, Lampard-a'n a lo thawhpui tawh ṭhin sate an ni.

Lampard chuan, "He squad-ah hian player talent nei ṭha tak tak an awm tih ka hria a, anni nena thawh ho a, ṭanpui hi ka châk a ni - chu chu he hmun ka pan chhan ber hi a ni," a ti.

Super Frankie hian player a nih laiin Blues tan match 648 khela goal 211 khungin, club tana goal khung hnem ber a ni a, assist vawi 145 a nei bawk - Premier League (3), FA Cup, Europa League leh Champions League-ah nomawi a chawipui a, coach a nihna angin 'chance' dang pek a ni leh ta a, a thlen chin apiang en zui a hlawh zel ang.