A chung berah Argentina

Football thuneitu sang ber FIFA chuan world ranking thar a ti chhuak a, kum ruk hnua a vawi khat nan Argentina chuan a chung ber dinhmun an luah leh ta. World champion hnungah hian France leh Brazil te an awm a ni.

Lionel Messi hoin La Albiceleste hian Qatar World Cup an chawi, a hnuah Panama (2-0) leh Curacao (7-0) te an sawp zui leh a, point an neihsa aṭanga point thum hmuh belhin a chung berah hian an awm.

France pawhin tun hnaiah Netherlands leh Ireland te chu Euro 2024 qualifying lamah an hneh a, pahnihnaah an awm. A sang zual panga zingah hian Brazil, Belgium leh England te an indawt a ni.

A huhoa World Cup 2020 thlen dil ram pathum - Portugal, Spain leh Morococo te chu a indawtin an awm. Cristiano Ronaldo awmna Portugal hi pakuana an ni a, Morocco nen an inkarah Spain an awm; African ram zingah Morocco hi an ranking a sang ber.

United States chu 13-na an ni, World Cup 2026 thleng tur ram pathum zingah an sang ber. North America ram dang pahnih Mexico leh Canada te nen football inelna lian leh ropui ber hi an inthlen ṭawm dawn a ni.

Asian ram zingah Japan (20) an sang ber - World Cup thleng zo hlim Qatar chu 61-na an ni. India pawhin hmalam panin 101-naah an awm a, ranking hmasa nen a inkarah point 8.57 an hmuh belh.

FIFA hian July 20-ah ranking thar a ti chhuak leh ang.