Man United mikhual tur Everton

Manchester United-in vawiin tlai dar 5:00 hian Old Trafford-ah Everton an mikhual dawn a, Erik Ten Hag-a hote hian an mualah result ṭha an neih ṭhin avangin chak tura beisei a ni.

Kar laihawl khan Man United hian Brentford an mikhual a, Marcus Rashford-a'n goal awm chhun khungin 1-0 in an chak. Kar liam ta khan Newcastle lakah Man United hi khel chhia a, Bees lakah erawh an khel ṭha hle.

Toffees hmachhawn hmain Man United an insiam ṭha thei a, Casemiro tel loin Bees an hneh. Brazilian midfielder hi hrem a la nih avangin Everton pawh a la hmachhawn thei dawn lo. Rawlthar duhawm Alejandro Garnacho pawh a la inhliam bawk.

United tana chanchin lawmawm erawh Christian Eriksen erawh a dam tawh a, Danish midfielder hi Toffees lakah inlan thei dinhmunah a ding.

Bees lakah Luke Shaw chu minute 37-na lekah thlak a ni a, Ten Hag-a'n inhliam nat a hlauh avanga thlak a ni thei. Chutihrualin English left back hi a khel thei lo a nih chuan Tyrell Malacia a lut thei ang.

Man United hian League Cup nomawi an chawi tawh a, April 13, Ningani zan hian Europa League quarterfinal-ah Sevilla an mikhual dawn. Ten Hag-a hoten FA Cup leh Europa League khelh tur la nei mah se season thara Champions League khelh an duh a nih chuan Premier League an ngaihthah a thiang lo a, Everton an hneh ngei a ṭul a ni.