Striker mamawh Bayern Munich

Bayern Munich-in zanin dar 7:00 hian Europa-Park Stadion-ah SC Freiburg an tlawh dawn. Bavarians hmachhawn tur hi Bundesliga-ah palina an ni ringawt lo a, kar laihawla German Cup aṭanga Bayern Munich pet chhuaktu an ni.

Thomas Tuchel-a awm hmain Bayern-in nomawi lian pathum Bundesliga, Champions League leh DFB Pokal-ah te an champion thei a, tunah erawh an treble champion thei tawh lo. German coach Tuchel-a tana harsatna belhchhah turin stiker Eric Maxim Choupo-Moting a inhliam.

Chelsea manager hlui Thomas Tuchel chuan, "Choupo-Moting hian a khupah hliam a tawrh avangin khelh theih a rinawm lo a, Dayot Upamecano hrem vangin a khel thei lo bawk ang," tiin a sawi. Bayern hian nipui bazarah striker ṭha mi Robert Lewandowski an chan a, rinrawlah Choupo-Moting an hmang. German manager hian Cameroon international striker hi dam ṭha pawh ni se a duh khawp loin niin a lang a, nipui bazarah striker an melh a rinawm.

A êng zawnga thlir erawh chuan Bayern hian kar laihawlah Serge Gnabry, Sadio Mane leh Jamal Musiala te bench-ah an dah thei a, tlarhma siksawi harsa tur niin a lang lo.