Haaland-a'n Man City eng nge a thlenpui dawn?

Erling Haaland a dam leh ta a, Manchester City-in table mawngphaha awm Southampton 4-1 in an sawp. Inrinni zana St. Mary's Stadium-a inkhelah hian Haaland-a'n goal hnih a khung a, Jack Grealish leh Julian Alvarez ten goal khat ve ve an khung.

Pep Guardiola hoten match 29-ah point 67 an hmu a, hmahruaitu Arsenal an phak lohna chu point nga chauh a ni. Chutihrualin nizan khan Arsenal-in Liverpool an hmachhawn a, Anfield-a inkhel result a zirin an inthlauhna hi a la danglam thei ang.

Haaland leh Goal

Manchester City-in kar liam ta khan Liverpool an mikhual a, 4-1 in an sawp. Reds sawptu zingah Haaland a tel lo a, Saints lakah erawh bul a rawn ṭan.

Mualneitu Saints-in an hmachhawn team an hria a, an tum ber chu goal venhim a ni. Haaland awm mah se City-in goal an khung thei mai lo a, Norwegian striker tel loin an ṭha zawk hialah a ngaih theih.

Mahse, minute 45-naah goal khung thei bik striker danglamna a rawn lang a, Kevin de Bruyne cross chu Haaland hian a tauh goal. Second half-ah City-in an nawr zui a, tun hnaia harhtharna chang Grealish-a'n 58-naah goal hnihna a khung.

Grealish hi mual vei lamah a hmuhnawm zui a, minute 68-naah a ball cross chu Haaland-a'n a 'bicycle kick' goal. Goal ropui bik a ni a, Haaland sawisel a thiang tawh lo, goal khung thei bik a nihzia nemnghehin a awm. Pep-a'n Haaland hi a thlak nghal a, thlak lo se chuan hattrick a siam leh hial ang.

City tlarhnung an muthlu zeuh a, Sekou Mara-a'n minute 77-naah Saints siphurh a sut ṭhen. Mahse, Saints tan City an ṭha mah mah. Goal venhim an tumna lamah box chhungah De Bruyne an titlu a, Julian Alavarez-a'n penalty hi minute 68-naah a khung.

Haaland hian league match 27 lek aṭangin goal 30 a khung der tawh a, tun season-ah City tan match 38 khel tawhin goal 44 a khung. Norwegian striker hian goal a khung hnem a, chutihrualin City hian nomawi an la chawi lo tih hriat a ṭha.

'Risk' a sang

Pep Guardiola hian out and out striker hi a kawl tawh ṭhin a, Barcelona-ah Zlatan Ibrahimovic enkawl tawhin Bayern Munich-ah Robert Lewandowski a enkawl tawh bawk. Mahse, Pep hian Ibra leh Lewy te a enkawl ṭum hian Champions League nomawi an chawi thei lo.

Man City a pan hnuah Pep-a'n Sergio Aguero chu nei bawk mah se Argentine forward hi a hun tawp lamah phei chuan a hmang mumal meuh lo. Citizens hian game mawi an khel a, inkhel an thunun a, Premier League nomawi pawh vawi li ngawt an chawi tawh.

Mahse, Pep-a hote hian UCL nomawi an chawi thei tlat lo. City-in UCL final-a Chelsea an hneh loh zawhah Harry Kane lakluh an tum a, an hlawhchham. Nikum nipui lai khan Haaland hi an lalut ta a, Norwegian striker an lak chhan ber nia lang chu European champion nih duh vangah a ngaih theih.

City-in possession football an khel chungin Haaland-a'n ball a khawih tam ve lo a, mahse goal a khung thung. Pep-a'n Haaland chhawr a duh avangin Joao Cancelo pawhin loan hmangin Bayern Munich a pan phah hial a, tunah khawvela right back ṭha ber ang hiala chhal Kyle Walker-a'n an khelh dan a hriatthiam tawk loh thu a sawi leh tawh.

Pep-a'n Haaland hmangin game plan a siam a, risk a la. Season tawpah Spanish manager risk lak hi a hlawhtling em, tih a hriat theih ang. Premier League-ah City hi pahnihna an ni mek a, League Cup nomawi chawi tawh lo mah se Champions League leh FA Cup lamah nomawi beiseina sang tak an la nei. April 11, Thawhlehni zan hian City-in Etihad Stadium-ah Bayern Munich an mikhual dawn a, he hun hi Pep-a risk lak chhan a tih theih - en a châkawm tawh hle.