Bayern tan De Ligt

Bayern Munich-in kar laihawla DFB Pokal aṭanga pet chhuaktu SC Freiburg lakah Inrinni zan khan phuba an la nghal a, Bundesliga inkhelah Matthijs de Ligt goal ṭha bik hmangin 1-0 in an hneh.

Bavarians hi Bundesliga-ah point 58 hmuin hmahruaitu an ni chhunzawm a, an elpui Borussia Dortmund-in Union Berlin 2-1 a hnehin champion lai hi point hnih chauhin an pha lo.

Europa-Park Stadion-ah Bayern-in na takin an nawr nghal a, Serge Gnabry leh Leroy Sane te an hlauhawm nghal hle. Sadio Mane pawhin chance ṭha a nei a, goalkeeper chauh a hmachhawn hnuah goal pawnah chiah a pet.

Bayern-in inkhel thunun mah se Freiburg winger Ritsu Doan chuan goal ban a tihper a, Bavarians-in chhantu an mamawh. Tlarhma lamin goal an khung thei lo a, Dutch defender De Ligt a rawn pen chhuak. De Ligt hian yard 20 vel aṭangin kawh zetin goal kilah a pet lut. Mikhual team hian nawr chhunzawm mah se goal erawh an khung belh tawh lo a, Yann Sommer-a chet ṭhat zarah goal an chhuah lo bawk.

Thomas Tuchel-a hote hian April 11, Thawhlehni zan hian Etihad Stadium an tlawh dawn a, Manchester City nena an inkhel tur hi khawvel thlir châk a ni. Treble champion thei dinhmuna ding Bayern-in Julian Nagelsmann an ban a, Tuchel hnuaiah DFB Pokal-ah an tla tawh - UCL-ah eng nge an an zel dawn tih chu hunin a hril ang.