Hero Super Cup a hmuhnawm

India rama league sang pahnih Indian Super League leh I League club-te tana inelna Hero Super Cup group stage chu April 8, Inrinni aṭang khan Kerala-ah khelh ṭan a ni a, inkhel a hmuhnawm nghal hle.

EMS Stadium-ah RoundGlass Punjab leh Kerala Blasters an inkhel a, I League champion tan hian Mizo tlangval pahnih Freddy Lallawmawma leh Hmingthanmawia (Valpuia) ten bul an ṭan. Valpuia inkhel tir lamah a chesual a, penalty a chawi vangin Blasters-in Dimitrios Diamantakos hmangin an khung hmasa.

Second half-ah Brandon VL Remdika te hmangin RoundGlass-in siphurh sut tum mah se Blasters wing back Nishu Kumar-a'n rilru fim takin minute 54-naah goal hnihna a khung. I League club tan Krishnananda Khundongbam-a'n khung ve mah se ISL club tan Rahul Praveen-a'n injury time-ah ṭha zetin a pet goal a, Kerala Blasters 3-1 in an chak.

Group A inkhel dangah I League club Sreenidi Deccan-in India captain Sunil Chettri telna Bengaluru FC chu 1-1 in an chelh. Sreenidi Deccan tan hian Ramhlunchhunga chu second half-ah a lut a, Vanlalbiaa Chhangte erawh bench-ah a ṭhu tluan thung.