Central YMA president R. Lalngheta'n Inter Branch TT Tourney a ṭhuai hawng

Central YMA leh Mizoram Table Tennis Association (MTTA) buatsaih LBS Suzuki 4th Inter Branch YMA Table Tennis Tournament 2023 'Ṭhuai Hawn' chu April 8, Inrinni zan khan Central YMA Hall, Tuikhuahtlangah neih a ni a, Central YMA president R. Lalngheta'n inelna hi a ṭhuai hawng.

Mizoram pum huap TT inelna hi ni li awh tur a ni a, April 11-14, 2023 chhung hian Hawla Indoor Stadium-ah khelh a ni dawn. TT hmanga Branch YMA inelnaah hian Mizo TT player ṭhate chu an tel kim hle tura ngaih a ni.

CYMA president R. Lalngheta chuan, "YMA hian tih tur chi hrang hrang a ngah hle. Table Tennis inelna kan nei chho ang a, a chang leh ruihhlo kan han vai (check) leh a, a chang leh Chapchar Kut te kan hmang leh daih. Amaherawhchu YMA-in a tum ber chu Zofate hmasawnna ngaihtuah a ni a, chuvangin Zofate kan hmasawnna tur kawng hrang hrangah hian ngaihtuahna thar hmang ṭheuh ang u," tiin kalkhawmte a chah.

Ṭhuai Hawnnaah (Spin Off) hian Rev Dr Lawmsanga'n hunserh a hmang a, Organising chairman R. Lalrinmawia chuan, "Inelna thianghlim taka kalpui hi a YMA hle. Ruihhlo laka fihlim hi ram leh hnam chhanna pawimawh a ni," tiin a sawi.

YMA Sports hnuaia inelnaah thupui neih a ni a, kumin atana thupui chu 'Ruihhlo do la, i ram chhan rawh' tih a ni. TT inelna zawh hian Central YMA Football Tournament neih leh tur a ni a, May thlaa neih turin ruahmanna a awm.

Inelnaah hian Branch 58 an tel a, categroy pali men's singles (212), women's singles (50), men's team (53) leh women's team (16) a awm ang.