Goal 1000 thawk chhuak thei Messi

Lionel Messi hi chu a danglam a, player dang tana tih theih loh tura ngaih pawh hi a ti leh mai ṭhin. Paris Saint German forward hian club huangah goal 1000 a thawk chhuak tling ta - a la belhchhah zel ang.

Inrinni zan Ligue 1 inkhelah PSG hian Nice 2-0 in an hneh. Messi hian Nuno Mendes-a ball pek chu laklawh nei miah loin a pet lut nghal a, second half-ah defender Sergio Ramos goal khung tur a siamsak leh bawk.

Record chu

ESPN chhinchhiah dan chuan Messi-a'n European League bikah goal 702 a khung ta a, a hmaa record a lo nihrual pui Cristiano Ronaldo (701 goals) chu a khum - Messi hian match 105 zetin a khel tlem zawk bawk a ni.

Argentina captain hian Barcelona tana a khelh lai khan match 778 aṭangin goal 672 a khung a, tuna a khelhna Paris club tan hian match 68 aṭangin goal 30 a khungsak leh der tawh, goal leh assist a neih zat belhkhawm chu goal 1000 a tling ta chiah.

Goal khung chauh a ni lo, ṭhiante tana siamsak kawngah a thawhhlawk tel ṭhin bawk hi a danglamna a ni; assist vawi 298 a nei tling ta bawk - club tana a mellung phun hi midang tana umphak leh a harsa tawh viauin a rinawm.

Kum 35 mi a ni tawh a, a vanglai a pel tawh. Mahse, khelmual chhungah Messi a la tar lo; tun season kal laia inelna hrang hrangah PSG tan match 34 aṭangin goal 19 a khung a, a ṭhiante khung tur vawi 17 a siamsak tawh bawk a ni.

Chhanna a pe

PSG match hnuhnung zawkah khan fans ṭhenkhatin Messi hi an au el, diriamna tawk mah se a match khelh lehna hmasa berah thil tih hmangin a chhanglet. PSG player zingah tun season atana goal thawk chhuak hnem ber a la ni hial.

Messi awmna PSG hi a zawna league match hnih chhung an chet fuh loh hnuah an chak leh ta a, tun hnai season 10 chhunga vawi riat champion thei Paris club hian kuminah pawh Ligue 1 nomawi an chawi leh ngei hmel ta hle.

PSG coach Christophe Galtier chuan, "Season tluan thlir chuan kan khel ṭha reng bik lo, a bik takin tun hnaiah kan khel ṭha lo zeuh zeuh. Nice lakah erawh ka naute khan chak an duh tih a takin an lantir, a hunah tak hnehna kan chang thei hi ka lawm," a ti.

Ligue 1 match 30 an khelh aṭangin PSG hian point 69 an hmu a, khelh zat inangah pahnihna Lens aiin point rukin an sang zawk. Khelh hmabak pariat an la nei, an chesual viau a nih ngawt loh chuan Galtier-a naute hi champion turin an dinhmun a ṭha.

A chiang lo

Lionel Messi hian tun season tawp thleng bak chu Paris Saint Germain tan contract a nei tawh lo. Paris club nen hian indawr mek mah se inremna an la ziak fel lo, tunah hian a club hlui Barcelona nen pawh an inbia niin an sawi.

European football huanga goal khung belh zel a duh a nih chuan Messi hian PSG tana contract ziah thar emaw, a club hlui Barca lama kir emaw duhthlan tur a nei. Saudi Arabian club aṭangin sawmna duhawm tak a dawng bawk.

Saudi lamah hian Ronaldo a kal tawh - Portugual captain hian Al-Nassr tan goal 11 a khungsak tawh, club tana goal khung hrim hrim lamah chuan Ronaldo hi a la sang hret, mahse a khelhna hi Europe a nih tawh loh avangin a boruak a danglam.

Messi (35) leh Ronaldo (38) te hian inkhelh an la chawlhsan mai dawn lo niin a lang. Europe-ah a nih loh pawhin football khelh hun chhunga goal khung hnem hrim hrim lamah chuan inelna ngaihnawm an la nei zel dawn niin a lang.