Coach a thar - thawnthu erawh a ngai!

Chelsea-in Graham Potter an ban hnuah Frank Lampard ban mah se khelmual thawnthu erawh a danglam thei chuang lo a, khualmualah tlak hlau Wolverhampton Wanderers chu 1-0 in an ngam lo.

Blues-in an ban aṭanga thla 27 hnuah Chelsea coach ni 'leh' turin Lampard a lo kir leh a, season tawp thleng atana contract an ziahpui coach hian kir leh hnua a match hmasa ber chu khualmualah kaihruai mah se Molineux-a Chelsea fan-ten Super Frankie hi an lo lawm hle.

Mahse, player a nih laia Blues fan-te ngainat rawn hian coach a nih hnuah fan-te lawmna thlen a harsat a, khualmualah mualneitu Wolves chu an chungnung tluan chhuak zak tiin a sawi theih.

Wolves tan Matheus Nunes chuan mawi zetin goal awmmchun a khung a, August thlaa Sporting Lisbon aṭanga Wolves zawmtu midfielder tan a club thar tana a goal khung hmasak ber a nih avangin goal hlu bik a ni.

Lampard-a'n Chelsea hliam tuam dam a tum tih hriat takin, Potter-a hnuaia tla tlum lo Raheem Sterling leh Conor Gallagher te chu bul a ṭantir a, striker Pierre-Emerick Aubameyang pawh February 26 hnua a vawi khat nana inlan tirin bench aṭangin a lut.

Mahse, Lampard-a ruahmanna chu engmah lo mai an chang a, tun season-a a vawi 12 nan goal an khung thei lo - a manganthlak lai ber chu Nilaini zan dar 12:30-a Champions League quarterfinal first leg khel tura Real Madrid an lenchilh a ṭul tur hi a ni.

Chelsea hi an league match hnuhnung 11-ah vawi hnih chiah an la chak a, league match thum chu a zawnin goal an khung ta lo - Chelsea hliam a dam thei rih lo.

Blues tan hian Joao Felix chuan goal khungna remchang nei mah se Wolves keeper Jose Sa a paltlang thei lo a, Chelsea striker hlui Diego Costa-a'n Wolves tana a khung loh pawh uiawm a tling.

Chelsea boss Lampard chuan, "Chelsea enkawl chuan hna a hautak dawn tih hriat sa a ni. Kan duh angin kan awm lo tih kan hria a, a chhan pawh a awm zel. Ni khat thil thuah kan buaina hi chinfel theih a ni lo tih ka hria - kan game-ah kha aia kan hriam zawk a ngai a, tlan chak hret a, ball inchuha dingchang zawk nih a ngai.

"Heng zawng zawng hi player-in an hriat loh chuan hnehna chan theih a ni lo. Eng pawh ni se, hengte thlak danglam tura he hmuna awm ka ni - ka thusawi hi insawiselna hrim hrim a ni lo a, he hmunah hian talent nei ṭha tak tak player an awm tih ka hria a ni," a ti a, Chelsea siam ṭhat a tum.