United, Spurs & Magpies an chak; Tuten nge Champions League khel dawn?

Season tawp a hnai tual tual a, Premier League a ngaihnawm tawlh tawlh - champion tuma Arsenal leh Manchester City inum boruak a ngaihnawm tluk zetin Champions League khelh tuma team inum boruak a ngaihnawm a, relegation zone tlansan tuma inum boruak lah a nep bik lo.

Hetihlai hian club langsar Liverpool leh Chelsea ten buaina tlansan an tum dan chu ngaihnawm tih loh phal a ni lo a, English top flight league ngainatu tan chuan tun lai chu Krismas ang char char a ni ber e!

Inrinni zan khan Premier League-ah Manchester United, Tottenham Hotspur leh Newcastle United te inlanin, an khingpui an hneh vek a, season tharah European football khelh an beisei chhunzawm zel.

United hian tlak hlau Everton chu 2-0 in an hneh a, Spurs-in 2-1 a Brighton & Hove Albion hnehin, Magpies chuan khualmualah 2-1 in Brentford an hneh thung.

Arsenal leh City chu season thara Champions League khel tur chianga ngaih an ni a, hmun ruak dang pahnih la awm chu club pathum hian an inchuh tiin a sawi theih - a la ngaihnawm dawn chauh.

United an comeback?

League Cup-ah United an champion a, mi tam takin hmana United kha a lo kir leh ta ang hialin an sawi hman. Mahse, nomawi an chawi hnua an league match hmasa berah Liverpool-in 7-0 in an sawp a, Europa League last 16 leh FA Cup quarterfinal-ah chak mah se league lamah Southampton (0-0) leh an elpui Magpies (2-0) lakah an chesual zui.

United fan-te an pawr tak tak hmain beng hniamin an awm a, champion hnuah thawm a reh hle. Mahse, Red Devils hian rei tak mutthluk an tum lo - kar hmasa khan Brentford chu 1-0 in an hneh a, Inrinni zanah Everton chu 2-0 in an hneh leh ta bawk a, an insiamṭha leh ṭan ta niin a lang.

Erik ten Hag-a team tan Scott McTominay chuan minute 36-naah ṭha zetin goal hmahruai a khung a, Anthony Martial chuan minute 71-naah a belhchhah bawk.

Red Devils tan World Cup hnua che ṭha Aaron Wan-Bissaka chuan goal khungna remchang nei mah se goal ruakah a chhuih lut lo a, defending-ah hma sawn viau mah se tun laia full back tam zawk thiam tel attacking-ah a ropui tawk lo tih kan hmu nawn.

United tan forward chhuanvawr Marcus Rashford chu hliam vanga lakchhuah a ngaih avangin lawm a kim lo a, hetihrual hian Martial bakah, kerek hliam vanga thla hnih leh a chanve a chawlh hnuah Christian Eriksen a lo kir leh tak avangin beiseina thar a awm - Casemiro pawhin Everton lakah hian match li hrem a nihna chu a tuar zo chiah.

Son = 100

Spurs tan tun season-a beisei phak lo Son Heung-min chuan a thiam a la theihnghilh lo tih pholangin, Brighton & Hove Albion lakah goal hmahruai a khung a, Asian footballer zinga Premier League-a goal 100 khung tling thei hmasa ber a ni.

Son hian vei lam aṭanga ball lalutin, penalty box pawn aṭangin goal chung kil sirah a thlawh lut a, player thiam bik goal a ni. South Korean forward chuan, "Hei hi a ni ka lo beisei ṭhin chu - Asian player zawng zawng, a bik takin South Korea ami ten ka sulhnu hi thlirin, an ti ve thei a ni, tih an inhriat phah ka beisei," a ti a, goal 100 a khung thei chu a lawm hle.

Kum 30 mi Son hian Premier League-a goal 100 khung tur hian match 260 a mamawh a, assist vawi 56 a nei bawk. Spurs tan Son bakah Harry Kane chuan minute 79-naah tun season-a a goal 25-na a khung bawk a, Brighton tana minute 34-naa Lewis Dunk goal khungin awmzia a nei phak lo.

Brighton an vanduai takzet - Kaoru Mitoma goal khung chu a kuta ball a khawih tel avangin pawm a ni lo a, Danny Welbeck-a khung pawhin Alexis Mac Allister-a ban a per avangin pawm a ni lo.

Hetihlai hian Pierre-Emile Hojbjerg-a'n a tihtluk avanga Mitoma penalty hlawh ngei nia ngaih chu video assistant referee (VAR) hmanga ennawn a nih hnuah pawm a ni lo a, bench lama buaina avangin Brighton boss Roberto de Zerbi leh Spurs coach lailawk Cristian Stellini te chu second half-ah hnawhchhuah ve ve an ni bawk.

Magpies tan beiseina

Ringhleltu tam mah se Newcastle-in khelmualah thiltih hmangin an chhanglet zel a, season thara Champions League khelh an beiseina chhi nung turin Brentford chu 2-1 in an hneh leh ta.

Mualneitu Brentford-in first half an khel ṭha zawk a, goal pawh an khung hmasa zawk. Rico Henry laka Magpies forward Alexander Isak-a foul chu VAR hmanga ennawn a ni a, referee-in penalty spot a kawh hnuah Ivan Toney chuan hmahruaina goal ni turin a khung.

Brentford-in goal an khung hun hi 45+1' a ni a, an vanneih zan ni se first half-ah hei aia tam goal khung thei an ni. Goal an khung hmaa Magpies defender Sven Botman-a'n âtthlak taka Kevin Schade a tihtluk avanga a penalty chawi chu Toney-a'n goal-ah a chantir thei lo a, a goal khung pakhat chu offside vangin pawm a ni lo bawk.

Second half-ah Magpies an rawn insiamrem. Minute 54-naah Joelinton chuan ṭha zeta ball a lakluh hnuin hnai set sawtah a pet a, Brighton keeper David Raya chuan lo dang perin, an lamah a lut. Newcastle tan minute 61-naah Isak chuan innghahna tlak a ni tih pholangin goal mawi bik a khung ve leh a, 2-1 in Magpies an chak zui.

Isak-a goal khung tur siamsaktu Callum Wilson chuan goal a khung belhah inngai mah se VAR rawn a nih hnuah handball vangin pawmsak a ni lo - Magpies hi league match nga chhung a zawnin an chak ta.