Milan club pahnih chungah Roma an awm!

Serie A champion chu Napoli an ni, tiin la ziah theih chiah loh mah se Naples club hi an champion dawn tia sawi ngam a ni tawh. Fal taka Luciano Spalletti naute an kal lai hian, an hnuaiah Italian club lian dangte chu na takin an lo inel ve mek bawk.

Jose Mourinho enkawl AS Roma chuan Paulo Dybala goal khat hmangin Torino 1-0 in an hneh a, table-ah pathumna dinhmun an luah. Roma hian champion lai AC Milan leh Inter Milan an kal san rih a ni.

Napoli an tho

An match hnuhnung zawkah Napoli hi Milan lakah an mualpho. Chesual thei an ni tih an hre thar - Zirtawpni zana Leece an lenchilhna inkhelah chuan chetsual nawn an tum tawh lo, chutih rualin point thum hmu tur chuan vanneihna an mamawh tel.

Giovanni di Lorenzo-a tauh luh chu Federico di Francesco hmangin Leece lamin an sut, second half minute 64-naah mualneitu defender Antonino Gallo chuan anmahni lamah a ti lut palh, goal dang lut zui loin Napoli an chak phah a ni.

Diego Maradona hunlai khan Napoli hian Serie A nomawi vawi hnih an chawi, hei bak chu Italian football inelna sang berah hian an la champion ngai lo. Kum 33 a liam hnuah hun ṭha an nei leh ta a, bawhpelh loa chhawrṭangkai ngei an tum ang.

Roma an sang

Inkhelh hmain AS Roma manager Jose Mourinho chuan, "Hnehna chang tur chuan khingpuite aia goal khung hnem a tawk mai," tiin a sawi a, a naute hian penalty aṭangin Dybala hmangin goal khat chauh an khung a, mahse hei hi chak nan a tawk.

Portuguese manager hi tlarhnung remphui thiam hmingthang a ni a, tun ṭumah pawh hian minute riat leka goal an khung hnuah hian khung belh ai chuah an neihsa venhim mai an thlang - an tum ang ngeiin an venghim tluan thei bawk a ni.

Serie A khelh hmabak match pakua chiah an nei tawh a, point 53 hmuin Roma hi pathumna an ni mek. Season hmasa Europa Conference League champion hian an dinhmun hum tlang an tum ngei ang, hmabak erawh a la hautak dawn.

Milan chak zo lo

Champion lai Milan tan nomawi humhim ngaihna a awm tawh lo tluk a ni. Stefano Pioli naute hian Empoli an mikhual a, goal lut loin an inhnehtawk. An chak zawh loh avangin point hnih an hloh a, pakhatna Napoli an hlat zual leh ta hret a ni.

Inter Milan pawh Salernitana nen 1-1 in an inhnehtawk a, Champions League quarterfinal khelh hmabak an nih avangin coach Simone Inzaghi-a'n a naute an hliam a hlau, second half-ah player a la chhuak hnem a, hun tawp ruala goal an chhuah avangin an vanduai ve bawk.

Inter ang bawkin AC Milan pawhin UCL quarterfinal an khel dawn a, league lama an tluk loh Napoli nen an intawng ang. Inter erawhin Thawhlehni zan hian Portuguese club Benfica an lenchilh thung dawn a ni.

Juve an tlawm

Sergej Milinkovic-Savic leh Mattia Zaccagni te goal hmangin Lazio chuan Juventus 2-1 in an hneh. Olad Lady tan hian Lazio lam goal khung inkarlakah Adrien Rabiot chuan goal khat khung ve mah se awmzia a nei phak lo.

Lazio coach Maurizio Sarri chuan, "Training-na lama kan hnathawh chu khelmual chhungah a takin kan lantir thei. League-ah chuan ngelnghet taka khelh tluan rei theih hi a pawimawh, chu chu season tawp thlengin kan tum ang," a ti.

Juve hi an coach Massimiliano Allegri a damloh avangin assistant manager Marco Landucci hoa khel an ni a, khel ṭha pangngai viau mah se hun pawimawhah Sarri enkawl Lazio an che fuh zawk zel - Juve hi pasarihnaah an awm mek.