Real tan league nomawi beiseina a bo?

Copa del Rey semifinal-ah Barcelona an sawp zo chauh a, Real Madrid chu hringnun zirlai zir chhunzawm tir an ni - engtiklai pawhin a hlim reng theih loh tih chu a takin an tem a, Villarreal lakah 3-2 in an tlawm.

Real an tlawm avangin hmahruaitu Barcelona an thlauhna chu point 12 a nih chhunzawm a, match khatin an khel tam zawk bawk. Catalan club hian zanin dar 12:30-ah Girona chu league match khel turin an mikhual dawn a, an chak chuan anmahni hnaih bertu Real hi point 15-in an tlansan ang.

Santiago Bernabeu-a inkhelah Real-in goal an khung hmasa zawk a, minute 16-naa Marco Asensio-a shot chu Villarreal defender Pau Torres chuan an lamah a dang lut a, 1-0 a ni.

Mahse, mikhual team an hnufual rei lo - Samuel Chukwueze chuan mawi zeta Nacho a bum hnuin minute 39-naah si phurh sutna goal a khung a, 1-1 in chawlhlawk hman a ni.

Second half ṭan aṭanga minute thumna lekah Real tan Vinicius Junior chuan a khung leh a, Villarreal defender rual bumin, kum 40 mi Pepe Reina goal venah 'cool' zetin a khung - mahni muala khel an nih bawk avangin La Liga champion lai hi an chak mai rinna a lian hman hle.

Mahse, Villarreal-in ngaihdan dang an nei - minute 70-naah Jose Luis Morales chuan si phurh a sut ve leh a, hun tawp nan minute 10 chiah a awm tawh tihah Chukwueze chuan penalty box pawn aṭangin mawi zetin chakna goal a khung zui a ni.