Israel Adesanya-a'n title a la lêt

UFC fighter ropui Israel Adesanya chuan UFC Middleweight title a hloh tawh chu a nei lêt leh ta a, November, 2022-a a ngam loh Alex Pereira hnen aṭang bawkin a la lêt.

Kum 33 mi Adesanya hian round hnihna lekah Alex Pereira chu knockout hmangin a hneh a, technical knockout hmanga a lo hneh loh tawh fighter lakah a chak chiang hle.

Nigeria-a piang, New Zealand khua leh tui nihna neitu Adesanya chuan, "Hetiang ang taka hlimna hi in hringnunah vawi khat tal intawn ve ṭheuh ka duhsak che u a ni.

"Mahse, ka hrilh ang che u - i nunah eng chona emaw tak i hmachhawn lo a nih chuan hetiang ang hlimna hi engtikah mah in tawng lo ang. I tluk a, thawh leh i tum loh chuan hetiang ang lawmna hi in tawng lo ang.

"In rilru tipaukhauh ula, hetiang ang hlimna hi tawng ve rawh u. Hetiang ang hlimna vawi tam ka tawng thei hi ka vannei takzet a ni," a ti a, a rilru paukhauh vanga hnehna chang a nih thu a sawi.

Adesanya hian MMA-ah vawi 26 fight hmachhawn tawhin vawi 24 hnehna a chang a, vawi hnih a tlawm tawh thung - a hneh tak Pereira hian MMA-ah vawi kua fight hmachhawn tawhin, a professional fight hmachhawn hmasak bera Quemuel Ottoni a ngam loh hnua a tlawm lehna chiah a ni.

UFC 287-a fight ngaihven hlawh dangah Gilbert Burns chuan unanimous decision (30–27, 30–27, 29–28) hmangin Jorge Masvidal chu a hneh bawk.