Burnley-in Premier League an khel dawn

Championship-ah Vincent Kompany kaihhruai Burnley-in Inrinni khan Riverside Stadium-ah mualneitu Middlesbrough 2-1 in an hneh a, season tharah Premier League an khel dawn. Clarets hian season ṭha tak an hman avangin Premier League khel tura ngaih an ni tawh a, tunah chuan chhiarkawp dan ang thlapin England-a football inelna sang ber an khel dawn tih hi a chiang tawh.

Riverside Stadium-a inkhelah hian Ashley Barnes hmangin Clarets-in goal an khung hmasa a, Boro-in second half-ah Chuba Akpom penalty hmangin siphurh sut mah se Conor Roberts-a'n mikhual team tan minute 66-naah chakna goal a khung.

Champion tur Clarets

Burnley hian match 39 aṭangin point 87 an hmu tawh a, an hnuai chiaha awm Sheffield United aiin point 11-in an hmu tam zawk. Championship-ah hian match 46 khelh tur a awm a, match sarih chauh khelh tur an neih tawh avangin Kompany hote hi champion ngei tura ngaih a ni.

Clarets hi tun season-ah vawi hnih chauh an la tlawm a, nikum November thlaa an elpui Sheffield United an hneh loh hnuah tlawm an nei tawh lo. Kompany hnuaiah hian Clarets-in tlarhnung aṭangin ball an inpe chhuak a, passing game ṭha tak an khel a, Championship an thunun.

Kompany hian squad thar a din a; Man City aṭanga loan hmanga an hawh Taylor Harwood-Bellis leh Southampton aṭanga an hawh Nathan Tella te chu squad tichaktu an ni. Championship aṭangin a sang pahnihin Premier League an khel dawn a, Clarets hnung zui turin Wigan Athletic hnehtu Sheffield United chu an khan ta hle.

Boro ve thung

Michael Carrick hnuaiah Boro-in hma an sawn a, tla thei dinhmun aṭangin Premier League inpetkai thei dinhmunah an ding. Amaherawhchu Boro hian Burnley an hneh loh hma hian Huddersfield lakah 4-2 in an tlawm a, pahnihna nih a harsat tawh dawn avangin playoff khelh tumin theihtawp an chhuah zui ang.

Boro hian zanin dar 10:00 hian Bristol City an hmachhawn lehnghal dawn a, Bristol khelmual Ashton Gate-a khelh tur ni mah se Carrick-a hote tan chak ngei a ṭul ang.