Inkhel hmuhnawmah chak zawk an awm lo; Liverpool 2-2 Arsenal

Premier League hmahruaitu, champion tum bawk Arsenal tan 'Anfield Boruak' zet chu a la harsa rih a ni. Goal hnih an khung hmasak vangin Gunners an lawm a, a tawpah erawh Liverpool lamin goal hnih chauh an khung let kha a mak zawk.

Pathianni zan Premier League inkhelah Liverpool chuan goal hnih an chhuah hmasak hnuah an sut zo a, an mikhual Arsenal nen 2-2 in an inhnehtawk - inkhel hmuhnawmah team pahnih tan point khata lungawi a ngai.

A tirah Arsenal

Inkhelh hmain Hillsborough chhiatna thleng hriatrengna hun hman a ni a, kum 1989 daih tawha thil thleng ni mah se mi 97 thihna hi Liverpool chanchina hmun pawimawh changtu, thinlunga an vawn reng a nih avangin an ngai thutak hle.

Mikel Arteta nauten bul an ṭan fuh, defender Virgil van Dijk-a ball dan fuh loh chu Andy Robertson-a'n pet chhuah tum mah se Gunners forward Gabriel Martinelli a rang zawk - Brazilian forward hian minute riatna lekah goal hmahruai a khung nghal phawt.

Reds inkhelin hma a sawn thei mai lo, mual sirah Martinelli a hlauhawm chhunzawm. Trent Alexander-Arnold-a'n a thlah zalen deuh avangin Brazil international hian Gabriel Jesus tauh luh tur a siamsak zui bawk.

North London club lamin minute 28 lekah si hnih faiin hma an hruai a, kum 2012 hnua a vawi khat nan Anfield-ah hnehna an chang dawn niin an ngai hman - stadium chhungah Gunners ṭantu tam tham lo mah se an thawm a na hle.

Arnold a fing

Jurgen Kloop meuh pawhin a naute a au hrah mai thei lo, captain Jordan Henderson-a'n goal hnihna an chhuah danah Arnold a zilh malh malh a, goal tam zawk chhuah theih an nih avangin Hendo a ṭang tih a hmelah a lang.

Mual sirah Arnold hian player thinchhia Granit Xhaka chu buaina a neih pui zauh, player pahnih hian yellow card an hmuh phah. English defender hian goal hnih an phuh avanga thawm nei mang lo 'Kop' ho kaih hrah nan a hmang a ni.

Arnold-a'n mual sira ball chhuak a lak pahnih fans lam a hawi a, a kut phar chhuakin thawm nei turin a fuih. Kop muthlu an harh, thawm ring tak an chhuah zui nghal, player tawnhriat nei tan pawha buaina tham a tling.

Premier League squad zinga naupang ber Gunners an chiai a, chawlhlawk hmain Mohamed Salah chuan si phurh a sut ṭhen, thi tawha inngai Liverpool ṭantute an phur thar a, goal khat la phur mah se chungnung zawk ang maiin an thawm a ring.

Reds tak tak

Liverpool ṭhat ber lai a ni lo, mahse an chet ṭhat loh lai pawhin Anfield-ah chuan an hlauhawm reng - an hlauhawm zia hriat duh chuan Manchester United fans zawh mai tur a ni - Erik ten Hag-a naute pawh 7-0 ngawta an mualphona hmun kha a ni.

Jurgen Klopp-a'n a naute a fuih ṭha tih a chiang, bench aṭangin Darwin Nunez leh Thiago Alcantara te a dah lut zui a, mualneitu an nihna chu a takin an lantir. Inkhel thunun chungin goal hlauhawm an nei chhunzawm deuh reng.

Arsenal tlarhnung a buai a, ball pet chhuah ringawt pawh an harsat. Buai nuaih karah Rob Holding chuan Diogo Jota ti tluin penalty a chawi. A pet turin Salah a rawn ding chhuak, Egypt international hian goal ban hrulah a pet chhuak.

Penalty pet hma hian Aaron Ramsdale chu a awm lohna tur hmunah a lo awm a, yellow card pek a ngai. Salah-a'n penalty a hlah avangin Kop an ngui a, goal khata la sang zawk Arsenal lamin point thum hmuh theih an la beisei zel.

Arnold & Firmino

Salah-a ball pek ṭha lutuk dawngtu Nunez-a'n Gunners keeper Ramsdale chauh a hmachhawn chungin goal a khung lo; Salah-a'n box chhung aṭanga a hlai luh tur pawh Ramsdale hian a dang hram - English keeper chet ṭhat a kaltluang zel.

Klopp-a'n goal an mamawh tih a hria, season tawp ruala chhuak tur Roberto Firmino a dah lut. Mikel Arteta-a'n tlarhnung tih phui a ngai tih a hria a, midfielder Martin Odegaard la chhuakin defender Jakub Kiwior a dah lut.

Liverpool goal nawr a na chhunzawm a, a bikin Oleksandr Zinchenko a nghing nasa. Arteta-a'n Zinchenko thlak turin Kieran Tierney a insiam tir, mahse an duh loh thil a thleng hman - Arnold-a'n Zinchenko kap karah ball lalutin Firmino tauh luh tur a siamsak a, 2-2 a ni chiah.

Reds defender Ibrahima Konate-a'n hnai tak aṭangin chakna goal su lut turah inngai mah se Ramsdale bawkin an lo dansak - an ui khawp ang. Martinelli-a'n Bukayo Saka leh Leandro Trossard te nuamsa taka ball pek theih tur a pass fuh tawk lo kha an sawi rei ve bawk ang.