Benfica khelmualah Inter Milan

Champions League quarterfinal first leg chu zaninah khelh ṭan a ni dawn a, zanina inkhel tur pakhat zawkah Inter Milan chuan zan dar 12:30-ah Benfica an lenchilh dawn.

Inter hian tun season Serie A-ah beisei an phak lo a, an league match hnuhnung berah Salernitana chu 1-1 in an inhnehtawkpui - table-ah pangana an ni a, season thara Champions League khel lo thei dinhmunah an ding mek.

Italian club coach Simone Inzaghi chuan, "Serie A kan tih ṭhat loh theihnghilh a ṭul - hei hi league lama kan dinhmun chu a ni mai a, mahse, Champions League-ah semifinal luh inchuh a ṭul tih hriat a ṭha," a ti a, Benfica chu team ṭha tak an nih thu a sawi bawk.

Benfica pawh an boruak ṭhat vanglai a ni bik lo. Primeira Liga lamah hma hruai mek mah se, an league match hnuhnung berah an hmelma kumhlun FC Porto chu 2-1 in an ngam lo a, mahni muala khel an nih bawk avangin an la na hle.

Team pahnihin zaninah thawnthu hlui theihnghilh a, hnehna chan tumin an khel dawn a, inkhel en châkawm bik huanga dah loh a rem lo ang. Inter tan Milan Skriniar leh Hakan Calhanoglu te inlan beiseiawm lo mah se he team hi Romelu Lukaku, Edin Dzeko leh Lautaro Martinez te ho awmna a la ni reng tih hriatsak a ṭha.

Benfica hi an ṭhat dan berin an inlan thei dawn lo - Goncalo Guedes, Julian Draxler leh Mihailo Ristic te an inhliam a, Nicolas Otamendi chu hrem vangin a khel thei dawn lo bawk. Mahse, tun season-a goal 23 khung tawh midfielder Joao Mario, midfielder Rafa Silva leh goal 25 khung tawh forward Gonçalo Ramos te an la awm.