ISL club lakah AFC tlarhnung a phui tawk lo

Aizawl FC-in Trau hnehin Hero Super Cup group stage khel turin an inpetling a, Mizo club tan Indian Super League club hmachhawn theih hi fiahna ṭha tak a ni.

April 9, Pathianni zan khan Manjeri Payyanad Stadium-ah Aizawl FC-in Hyderabad FC lakah fiahna hmasa ber an hmachhawn a, fiahna an paltlang zo lo. ISL club tan Joel Chianese leh Joao Victor ten goal an khung a, Mizo club hian injury time-ah Ivan Veras hmangin siphurh an sut ṭhen.

I League club te hi season khat chhunga an sum sen zatah pawh ISL club nen chuan an inthlau a, hei vang hian Aizawl FC tan ISL league round-a pahnihna laka point hlawhchhuah hi a harsa dawn tih a chiang.

Mizo club hian ṭha takin bul an ṭan a, amaherawhchu corner kick an pet fuh tawk loh avangin counter attack hmangin Hyderabad-in goal an khung a, minute 17-naah Joel Chianese-a'n ISL club tan a khung.

Aizawl FC-in an hna hmasa ber goal venhim an ngaihthah a, goal khung an tum avangin ISL club-in vuak letna remchang an neih phah. Goal hnihna luh danah erawh AFC an vanduai - captain Lalchhawnkima'n penalty a chawi a, Mizo club tan referee thutlukna pawm thiam a har ang.

Joao Victor-a'n minute 51-naah penalty ṭangin a khung a, Aizawl FC-in goal dang an chhuah belh tawh lo. Injury time-ah Ivan Veras-a'n siphurh a sut ṭhen a, goal dang khung belhna hun a awm tawh lo.

Group B inkhel dangah Odisha leh East Bengal te 1-1 in an inhnehtawk a, group khat aṭanga team khat chauh luh tur a nih avangin Mizo club tan semifinal thlen phak a harsa dawn.