Zanin dar 12:30-ah Pep leh Tuchel fiahna; Man City Vs Bayern Munich

Champions League quarterfinal inkhel tur draw neih a nih khan Manchester City leh Bayern Munich inkhel tur hian mit a la nghal a, tunah phei chuan boruak a sang lehzual. German champion hian an manager Julian Nagelsmann banin Thomas Tuchel an lalut a, Tuchel-a'n Bavarians a enkawl tak avangin Man City nena an inkhel tur hi en a châkawm sawt.

Zanin dar 12:30 hian Etihad Stadium-ah Man City hian Bayern hi an mikhual dawn a, second leg hi April 19, Nilaini zanah Allianz Arena-ah khelh a ni ang. Coach ṭha pahnihin an naute an khelhtir dan tur hriat a châkawm a, player an ṭhat hrim hrim avangin inkhel tur hi en a châkawm hrim hrim bawk.

Pep Vs Tuchel

Pep Guardiola leh Thomas Tuchel te hi manager inhrechiang ber zinga mi an ni hial ang. Pep-a'n Bayern a enkawl tirh khan Thomas Tuchel-a'n Mainz a la enkawl a, 2013/14 season-ah Spanish manager hian ṭum hnih a hneh nghal.

Tuchel-a'n Borussia Dortmund pan mah se 2015/16 season-ah Pep-a bawk a chungnung. Pep-a hote hian Dortmund hi league-ah 5-1 in an sawp a, DFB Cup final-ah 4-3 in an hneh a, Signal Iduna Park-ah erawh 0-0 in an inhnehtawk.

Kum nga hnuah manager pahnih hi an inhmachhawn leh chauh a, Pep-a'n Man City enkawlin Tuchel-a'n Chelsea a enkawl tawh thung. FA Cup semifinal (2020/21)-ah Tuchel-a'n Pep-a kaihhruai City a hneh a, Etihad Stadium-ah 2-1 in an hneh zui a, a pawimawh ber Champions League final-ah 1-0 in an hneh leh bawk.

Tuchel-a'n Germany-ah Pep-a Bayern ngam lo mah se England-ah Pep-a City a ngam ta thung. Spanish manager hian ngaihtuahna a hmang nasa mah mah tia sawitu an ṭhahnem a, UCL final hmaa Pep-a'n player a siksawi nasa lutuk chu Europe-a inelna sang bera City an la champion lohna chhana ngaih a ni.

Haaland awmna

Pep leh Tuchel te inhmachhawn ṭum hian German manager enkawl club hi a chhe hret zawka ngaih an ni zel. Tun ṭumah erawh Tuchel-a'n German champion a enkawl ta a, Man City aia record nei ṭha satliah ni loin player pawh an neih ṭhat tel avangin zanin inkhel tur hi manager inbeihna tak takah a ngaih theih.

Man City-in international break hnuah match hnih an khel tawh a, Erling Haaland tel leh tel loin an chak ve ve. Haaland tel loin City hian Liverpool 4-1 in an sawp thei a, Norwegian striker aiawhtu Julian Alvarez-a'n goal hmahruai a khung.

City hian Haaland telin Southampton 4-1 in an hneh a, Haaland-a'n goal hnih a khung. Norwegian striker hi hattrick siam thei ni mah se goal hnih a khung zawhah an thlak nghal a, Bayern hmachhawn turin an hahdam tirah a ngaih theih.

City hi Haaland tel loin an game a nalh zawk tiin a sawi theih. Saints an hmachhawn ṭum aiin team ṭha zawka ngaih Liverpool lakah ball an in pass tam zawk. Mahse, Haaland erawh goal khung thei bik a ni a, Pep-a meuh pawhin Norwegian striker hman ṭangkai tumin a khelh dan hmang pawh a siksawi reng a ni.

Khelh dan hmang siksawi hi Joao Cancelo leh Kyle Walker ten tuar deuh mah se Kevin de Bruyne erawh a ṭangkai ngaiin a la ṭangkai reng a, tun hnaiah Jack Grealish-a'n nasa takin hma a sawn bawk. City-in Haaland milin game plan an siam a, chutihrualin Bayern hneh loa an tlak leh si chuan Pep-a'n thutlukna a siam sual tiin a sawi theih ang.

Striker awm lohna

City-in Haaland an neih laiin Bayern striker Eric Maxim Choupo-Moting a inhliam a, Cameroonian striker hi a inlan thei dawn lo. Bayern hian kartawp khan Choupo-Moting tel loin Freiburg an hneh a, tlarhmaah Serge Gnabry an dah.

Cameroonian striker hi awm lo mah se Gnabry thlawp tur hian Sadio Mané leh Leroy Sane bakah Kingsley Coman te an awm avangin Tuchel-a'n duh thlan tur a nei ṭha. Thomas Muller leh Jamal Musiala te an la awm bawk a, Bayern-in out and out striker nei lo mah se City tlarhnung tana buaina siam thei tur an la ṭhahnem hle.

Bayern hian loan hmanga City aṭanga an hawh João Cancelo an chhawr thei dawn a, chutihrualin Portuguese defender ai hian Benjamin Pavard a inlan a rinawm zawk. Nagelsmann-a'n Bayern tlarhnung a tiphui thei lo a, Tuchel-a pawhin a la rem dik thei bik lo. Man City lakah Bayern tlarhnungin fiahna an hmachhawn dawn a, Matthijs de Ligt-a'n a theihna sang bera a khelh chhuah leh a ṭul ang.

Engpawh chu ni se Bayern-in treble champion theih laiin an manager Nagelsmann an ban hreh lo a, Tuchel-a'n pressure a ngah sa. Man City pawhin Champions League an duh a, Pep-a meuh pawhin, "UCL kan champion lo a nih chuan ka hlawhchhamah ka ngai dawn," ti hialin a lo sawi tawh a, hei hian zanina an inkhel tur pawimawhzia a sawifiah a ni.

An intluk tawk

Bayern Munich leh Manchester City te hi ṭum ruk an inhmachhawn tawh a, vawi thum ve ve an chak. Kum 2011 leh 2014 chhung khan UCL group stage-ah ṭum ruk an inhmachhawn a, season tinin vawi khat ve ve an chak zel.

Team pahnih an inhmachhawn hnuhnun ber chu November 25, 2014 kha niin Man City hi 3-2 in an chak. English club hi Manuel Pellegrini-a'n a enkawl a, English club tan Sergio Aguero-a'n hattrick a siam.

Bayern enkawltu erawh tun ṭuma Man City boss Pep Guardiola a ni thung a, German club tana goal khungtu Xabi Alonso-a'n Bayer Leverkusen enkawl tawhin Robert Lewandowski pawh Barcelona tan a khel ta bawk.

Kum 2014-a an intum hmasak zawkah Jerome Boateng-a'n Bayern chakna goal a khung thung. Team pahnih inkhelh ṭum hian chakna goal hi hun tawp dawn hnaiha an khung ve ve a ni a, hei hian team pahnih intluk tawkzia a tilang.

An intawn hnuhnun bera khel zingah Thomas Muller chuan Bayern tan hmun pawimawh a la chang a, Manuel Neuer erawh hliam vangin a inlan thei dawn lo. Man City erawh an danglam hlak tawh thung.

Fixtures hautak chu

Manchester City leh Bayern Munich te hi an ram league sang berah champion lai ve ve an ni a, nomawi hum tura rin ni ve ve mah se an dinhmun a derthawng ve ve.

Pep Guardiola hote hian Bayern ṭum hnih an hmachhawn tur karah hian relegation zone-a awm Leicester city chu an mikhual dawn a, Allianz Arena-a an inkhelh zawh chiahah FA Cup semifinal-ah Sheffield United an hmachhawn nghal ang.

Man City tan Foxes hi hna awlsam anga ngaih theih ni mah se season dang aiin an squad a chhah lo a, Bayern ṭum hnih an hmachhawn kara an hmachhawn tur a nih avangn point hloh a hlauhawm. Arsenal hnuaia awm an nih miau avangin point khat hloh pawh a pawi dawn.

Bayern-in kartawp khan SC Freiburg 1-0 in an hneh hram a, Etihad Stadium an tlawh zawhah Hoffenheim an mikhual ang. Aizawlah pawh rawn zin tawh Hoffenheim hi table hnuai lama awm ni mah se a zawna vawi thum chak zawn tawh an ni. Allianz Arena-a Man City an mikhual zawhah Bayern hian Mainz an tlawh leh ang, Mainz hi match riat chhung tlawm hmel an hmu tawh lo.