NBA playoff khel turin Warriors an tlingNBA playoff khel turin Warriors an tling

Golden State Warriors chu NBA playoff khel turin a tawp niah an tling. NBA champion lai hian nimin zing khan Portland Trail Blazers chu 157-101 in an hneh a, guard Stephen Curry awmna hi Western Conference table-ah parukna an ni.

Warriors hian an dinhmun tichiang turin chak an mamawh, inkhel pawimawhah GSW hian bul an ṭan fuh takzet - quarter hmasa berah ringawt pawh point 55 an nei hman, hei hi an club record thar a ni hial.

Curry-a'n minute 22 a khelh aṭangin point 26 a nei hman, hnehna an chan theih nana a fawng chelhtu a ni. An phu ang ngeia hnehna an chan avangin play-in khelh hah ngai loin playoff an khel thei dawn a ni.

Western Conference aṭang hian Los Angeles Clippers pawh an tling. Clippers hian Phoenix Suns chu 119-114 a hnehin pangana dinhmun an sawhnghet ve bawk. Inkhel dangah Los Angeles Lakers chu chak mah se Warriors leh Clippers an chak avangin play-in an khelh a ngai dawn.

NBA playoff hi regular season chhunga a tiṭha zual pariat ten an khelh ṭhin a ni. Conference pahnih table-a parukna chin chu an tling nghal, pasarihna aṭanga 10-na te chuan play-in hmangin playoff khel tur hi an zawng dawn a ni.