Atletico Madrid-in Champions League an beisei zel
Pathianni zan khan Atletico Madrid chuan khualmualah 2-1 in Rayo Vallecano an hneh a, Spanish club hian season thara Champions League khelh an beiseina chu an chhi nung zel.
Vallecano khelmuala La Liga match inkhelah Atletico tan Nahuel Molina leh Mario Hermoso te chuan goal khat ve ve an khung a, Rayo tana Fran Garcia goal khungin awmzia a nei phak lo.
Atletico hian league match 12 zet chu a zawnin tlawm an nei ta lo a, pahnihna Real Madrid an thlauhna pawh point hnih chiah a ni ta - match 28 ve ve an khel tawh.
La Liga-ah hian Barcelona chuan point 71 neiin hma an hruai mek a, anmahni hnaih bertu Real aiin point 12-in an sang zawk - nizan khan Barca hian Girona an mikhual a, an chak chuan an hmahruaina hi point 15 a ni tawh ang.
A goal hma
Atletico-in Rayo goal-a khung turin hun an mamawh rei lo - minute 22-naah Antoine Griezmann chuan ṭha zeta ball thlawh lutin, hei hi Alvaro Morata chuan Molina tana siamsak zeuhin, nipui laia Atletico pantu right back Molina hian Spanish club tana a goal hmasa ber ni turin a khung.
Madrid khaw club hian chawlh an tum lo - goal an khung aṭangin minute hnih a liam hman chauh tihah Hermoso a inlar lehnghal a, Spanish defender hian corner aṭanga ball kal chu an goal hnihna turin a tauh lut.
Atletico-in first half chhungin goal hnih an khung a, Rayo comeback beiseina tizuai turin defender Florian Lejeune chu minute 62-naah hnawhchhuah zui a ni. Mahse, Rayo hian player kim loa an khelh hnuah Fran Garcia hmangin si phurh an sut ṭhen zawk.
Rayo goal khung hun erawh minute 85-na a ni a, hun a tam tawk tawh loh avangin si phurh sutna hun tur a awm tawh lo - 2-1 in Atletico an chak a, Champions League khelh an beiseina an chhi nung zel.
Atletico harhna
World Cup khelh a nih hmain Atletico an talbuai ngun a, November-a chawlh a nih hma khan league match 14 khel hmanin, vawi li an tlawm a, vawi thum draw an nei a, vawi sarih chiah an chak!
Mahse, World Cup ngeih ber tih ngam khawpin, Qatar-a inelna neih zawhah Atletico an insiamrem a, World Cup zawha league match 14 an khelhah vawi khat chiah an la tlawm a, vawi thum draw neiin, vawi 10 an chak - league match nga a zawnin an chak ta.
Atletico coach Diego Simeone chuan, "Tlarhnungah player inhliam an tam avangin season chawhma lamah kan che chhe zawk. World Cup a zawh chiah khan kan insiamrem ta a ni. Kan team kan khel ṭha takzet a, rilru zawng zawng an pek chuan ka player-ten an tih theih kan hmu a ni," a ti.
Season ṭantir lama chetsualna avangin Madrid khaw club tan champion beisei ngam niin a lang tawh lo a, hetihrual hian an hmelma kumhlun Real Madrid nek chhuak a, pahnihna ni chunga season khar erawh beisei theih a ni.