Clay court vanga phur Djokovic

Novak Djokovic chuan clay court season an hmang ṭan leh thei tur chu a lawmawm a tih thu a sawi, a tan chuan inkhelh a thiamna ber hmun ni lo mah se kawng siamsaktu a nihna a awm vang a ni.

Season hmasa khan Covid 19 laka invenna vaccine a lak duh loh avangin Australian Open bakah United States chhunga inelna a hmachhawn thei lo, kuminah pawh US-ah chuan a la zin lut thei lo.

Nikum khan Australian Open khel thei lo mah se clay court inelna a hmachhawn thei. Kuminah pawh US lama inelna Indian Wells leh Miami Open khel thei lo mah se Monte Carlo Masters chu a khel thei dawn.

World number 1 Djokovic chuan, "Monte Carlo ka khelh hnuhnung pathumah ka che ṭha tawk lo deuh, kumin chu ka tan kum ṭha a nih ngei pawh ka beisei," a ti, first round a khelh a ngai lo a, a hmachhawn tur a la hriat loh.

Beiseina a siamsak thu sawi chhunzawmin Djokovic chuan, "Tun hnaiah ka khel tam lo, thla khat chhung tournament khel loin ka awm. Chuvangin tuna inelna ka hmachhawn leh tur hian min tiphur takzet a, ka tan chuan thil lawmawm tak a ni," a ti.

Monte Carlo Masters-ah hian Rafael Nadal pawh inlan a tum a, mahse Spanish star hi Australian Open khelh laia a hliam kha a la dam fel lo. French Open inbuatsaihna zinga pakhatah hian a inlan thei dawn lo a ni.