Brighton kha penalty hmu tur an ni - PGMOL
English football-a referee intelkhawm pawl Professional Game Match Officials Limited (PGMOL) chuan Tottenham Hotspur leh Brighton & Hove Albion inkhel thlirletna an nei a, Brighton chu penalty pek an nih loh chungchangah penalty hmu tur an nih thu an sawi - se bo hnua se kawngkhar!
Brighton leh Spurs inkhelah hian Pierre-Emile Hojbjerg chuan hlauhawm takin Kaoru Mitoma a titlu a, Brighton hian penalty an hmu ngei dawn niin a lang. Mahse, referee Stuart Atwell-a'n penalty a pe lo a, video assistant referee (VAR) ngaihdan a danglam lo.
He thil a thlen lai hian team pahnih hi 1-1 in an inhnehtawk a, Harry Kane chuan Spurs tan chakna goal a khung zui - Brighton tan referee thutlukna a lungawi thlak loh a, PGMOL-in thuthar an neih leh tak bawk siah chuan an lungawi lohna hi belhchhahin a awm ang.
Brighton senior official-te chu referee thutluknaah lungawi loin, PGMOL chief Howard Webb nen pawh an inbia a, inkhela thil thleng ṭhenkhat chu referee pawl lam hi sawifiah turin an phut.
PGMOL chuan thuchhuah siam zuiin, "Brighton thuneitute nen inbiakna neih niin, PGMOL chuan Kaoru Mitoma penalty pek loh chungchangah tihsual a awm tih a pawm a ni," an ti a, inkhela thil thleng dang chu an zirchian chhunzawm tur thu an sawi.
Brighton hian Spurs nena an inkhelah hian, thutlukna pangaah an lungawi loh thu an thlen a, Kitoma penalty bakah hian an goal khung pahnih handball vanga pawm loh te, Lewis Dunk-a kawr pawh a nih laia penalty pek a ni lo chu an hrethiam lo bawk.
Hei chauh a ni lo - Brighton chuan an coach Roberto de Zerbi hnawhchhuah a ni chu an hriatthiam loh thu an sawi a, team pahnih coaching staff inkara buainaah an Coach chu buaina chhuak tur ṭhelh mittu a nih thu an sawi.
De Zerbi bakah hian Spurs coach lailawk Cristian Stellini pawh he inkhel boruak 'hot' takah hian hnawhchhuah a ni bawk a ni.
Brighton hi an vanduai ṭhin. PGMOL hian February thlaa Crystal Palace nen an inkhelh ṭuma thil thleng chungchangah ngaihdam an lo dil tawh bawk a, World Cup hmaa Villa nen an inkhelh ṭuma Solly March penalty hmuh loh chungchangah ngaihdam an dil tawh bawk.
BBC pundit leh Premier League-a Blackburn Rovers lo champion pui tawhtu, striker ṭhin Chris Sutton chuan, "An chanvo chu chhuhsak an ni," tih hialin Brighton laka referee chet dan a lo dem tawh a, kha inkhelah khan chak ngat se table-ah parukna niin, match hniha khel tlem zawkin Spurs hi point hnih chiahin an phak lo ang. Mahse, a pawi tur a pawi zawh tawh hnua ngaihdam dil chu an chan tawk a ni.