Roy-a ‘Palace’ an hmuhnawm!

Crystal Palace-in mamawh laia ṭanpui vartu hnai reng an nei a, a hming chu Roy Hodgson a ni - Palace-in Patrick Vieira an ban khan an coach hlui, 2020-21 season zawha chhuak ta Hodgson a lam an hawi a, English coach hian coaching a chawlhsan tawh chu theihnghilhin a naupan lai aṭanga a club ṭan leh player a nihna anga a career ṭanna club ṭanpui turin a lo kir.

Mi tam takin Palace thutlukna mak an ti a, rinhlelhna nen an thlir. Mahse, kum 75 mi coach hian a kum tam ve deuh tawh mah se theihna sang tak a nei tih a pholang nawn leh ta a, Pathianni zan khan Palace hian Leeds United chu 5-1 ngawtin an sawp!

Hodgson hian Palace chu a lo kir hnua league match hnih an khelhah a chakpui ve ve a, khualmuala Leeds an sawp hma hian Leicester City chu 2-1 in an lo hneh tawh bawk - table-ah 12-na dinhmun luahin, relegation zone an hlat zel.

Elland Road-a inkhelah Leeds tan Patrick Bamford chuan minute 21-na lekah goal hmahruai a khung a, mikhual team tan hna a hautak dawn tih a lang - fans tam takin Hodgson an rinhlelhna dikna chu a lang chho ṭan dawn niin an hria.

Mahse, Bamford-a'n Leeds tana a goal 50-na a khung hnuah hian mualneitu team hian goal an khung ve leh tawh lo. First half hun pek belhah Marc Guehi chuan Palace si phurh a sut a, 1-1 in chawlhlawk an hmang.

Second half ṭan aṭanga minute riatna lekah Jordan Ayew chuan ṭha zeta ball tauh lutin, mikhual team hi hma a hruaipui a, Eberechi Eze chuan minute 55-naah belhchhahin 3-1 a ni der!

Palace-in an la duhtawk mai lo. Khel ṭha em em mai Michael Olise chuan Odsonne Edouard tan siamsakin, an goal lina an khung a, Ayew chuan minute 77-naah khung lehin, a hmawr a bawk a, 5-1 in Palace an chak!

Kum 21 mi Olise-a'n goal khung lo mah se fak a phu takzet a, England-a piang, France tana youth level-a khel Olise hian assist vawi thum ngawt a nei - a chanchin hian ngaihven a hlawh zel ang.

Hetihlai hian Leeds erawh tun season Premier League-ah goal 54 zet an chhuah ta a, anni aia chhuah hnem chu Bournemouth chauh niin, goal 57 an chhuah. Mahse, Cherries hi table-ah 15-na niin, Leeds aiin point khatin an sang.

Leeds hian league match 30-ah point 29 neiin, relegation zone an hlatna chu point hnih chiah a ni. Season thara Premier League khelh chhunzawm zel an duh a nih chuan insiamṭhat ran an mamawh a, February aṭanga Leeds enkawl ṭantu coach Javi Gracia tan tlarhnung remphui dan ngaihtuah ran a ṭul.

Palace erawhin point rukin relegation zone an tlansan ta a, season thara Premeir League khelh zel beiseina a nung thar ang tih a chiang. Hetihlai hian coach Hodgson erawh a uang duh lo.

Kum 75 mi coach chuan, "Ni duhawm tak a ni a, mahse, hetiang hi a ni reng dawn lo. Tun aia naupangin, thil thleng thei ngaihtuah ching tak ni lo ila chu, tun ai hian ka hlim zawk mah mai thei.

"Mahse, relegation zone aṭangin kan la him lo tih ka hria a, buaina aṭanga kan talchhuah hma chu hahdam taka awmin, kan lawm nghal ringawt thei lo a ni," a ti a, a la fimkhur hle.