Santiago Bernabeu-ah Lampard-a 'Chelsea' an mualpho dawn em?

Chelsea-in tun season-ah manager pahnih Thomas Tuchel leh Graham Potter te an ban tawh a, season an hmang ṭha lo tih a chiang. Chutihrualin London club hian Champions League quarterfinal an lut a, Europe-a inelna sang berah hian champion thei an ni.

Zanin dar 12:30 hian Frank Lampard-a enkawl Chelsea chu Europe-a club hlawhtling ber Real Madrid khelmual Santiago Bernabeu-ah an lenglut dawn. Inkhel pawimawh ni mah se ṭum dang zawng aiin Blues ṭantute an hlauthawng a, a chhan chu mualpho thei dinhmuna an din vang a ni.

Potter-a hnuaia beisei pha lo Chelsea hi Lampard-a hnuaiah beisei a sang chuang lo a, club legend hnuaia an match hmasa berah Wolves an hneh lo. Lampard hi Chelsea bakah Everton-ah a hlawhchham tawh a, London club pawh hian tun season chhung atan chauh contract an ziahpui a ni.

Champion lai 'Real'

Real Madrid hi Champions League champion lai an ni ringawt lo a, European champion vawi 14 ni tawhin record nei ṭha ber lawrlak an ni. Tun thla ṭantirh lamah phei chuan Real hi an vul lehzual a, Valladolid chu 6-0 ngawtin an sawp.

Copa del Rey semifinal second leg-ah Nou Camp an luhchhuah a, mualneitu Barcelona chu 4-0 in an sawp. El Clasico-ah hian goal khungtu ropui Karim Benzema-a'n hattrick a siam a, French forward hian Liverpool an hneh ṭumin Anfield leh Bernabeu-ah goal a khung ve ve bawk.

Real ṭhatzia sawitu ṭhenkhat erawhin Benzema hi Los Blancos player ṭha berah an chhal lo a, Vinícius Júnior chu tun dinhmuna Carlo Ancelotti hmanraw neih ṭhat berah an ngai. A tawi zawngin Real hian kil tinah player an nei ṭha a, midfield-a tawnhriat nei ṭha pahnih Luka Modric leh Toni Kroos te hi UCL quarterfinal chinah chuan team tan an hlu ṭhin hle.

Chutihrualin 'Real' meuh pawh hi chesual thei an ni a, an match hnuhnung berah an mualah Villarreal lakah 3-2 in an tlawm. Los Blancos hian UEFA Super Cup leh FIFA Club World Cup nomawi an chawi tawh a, Copa del Rey-ah final an lut tawh - Champions League phei chu chawi ngei an duh dawn avangin sa huai an ser ang.

Hmabak

Chelsea hi pawr thei an ni lo a, chutihrualin an squad thlirin beng khup sa tur chu an ni bik lo. Lampard hian manager angin record duhawm nei lo mah se UCL-ah erawh a record a ṭha.

Blues hian Lampard-a hnuaiah 2020-21 season khan group stage-ah hneh loh an nei lo a, vawi li chakin an group-ah hmahruaitu an ni. A tawi zawngin Lampard hian UCL-ah tlawm a la nei lo a, kum hnih liam ta khan Thomas Tuchel-a'n a hna zawh loh a zawhsak a, kuminah German coach hna zawh loh hi zawhsak a tum dawn.

Chelsea manager lailawk Lampard chuan, "Inkhel zawng zawng hi a harsa vek a, eng team pawh hmachhawn ila ka player-te ka ringtawk tur a ni. Chak kan duh," tiin a sawi.

Lampard hian Real Madrid a hrechiang a, Spanish club hmachhawn turin player tawnhriat nei ṭha a thlan a rinawm. Chutihrualin César Azpilicueta (khup) leh Thiago Silva te a chhawr thei dawn lo a, amaherawhchu midfield-ah hmabak nei êng Enzo Fernández leh player rintlak Mateo Kovacic te ho turin N'Golo Kante a dam tawh - Real tan Chelsea tlarhnung paltlang hi a awlsam lo ang.