Hero Super Cup-ah goal a sur

Thawhlehni zan khan Hero Super Cup khelh chhunzawm a ni a, match hnih lekah goal 14 a lut. EMS Stadium, Kozhikode-ah ATK Mohun Bagan-in Gokulam Kerala 5-1 in an sawp a, inkhel dangah Jamshedpur FC-in FC Goa 5-3 in an hneh ve bawk.

Hero Super Cup-ah hian team 16 chu group liah pali zela ṭhen darh an ni a, group tin aṭangin a sang ber ṭheuhin semifinal an lut ang. Mohuan Bagan tan Liston Colaco a che ṭha a, Goan tlangval hian minute rukna lekah kawh zetin a pet lut.

Colaco hian minute 27-naah goal hnihna a khung a, goal khatna ang thoin a ropui. Hugo Boumous, Manvir Singh leh Kiyan Nassiri ten goal khat ṭheuh Bagan tan an khung belh. Gokulam Kerala tan Sergio Mendigutxia-a'n siphurh a sut ṭhen a, amaherawhchu Kerala-in goal an khung hian 4-0 a nih tawh avangin result a tidanglam phak lo.

Zan lam inkhelah FC Goa-in Noah Sadaoui hmangin minute rukna lekah goal an khung a, amaherawhchu Mizo tlangval Ricky Lallawmawma leh R. Laldinliana te telna Jamshedpur-in a tawp an khar ṭha zawk.

Jamshedpur-in minute nga hnu lekah Pratik Chaudhari hmangin siphurh an sut a, Rafael Crivellaro-a'n goal hnih a khung bakah FC Goa defender Fares Arnaout-a'n an lamah a tilut. 4-1 a nih hnuah Goa-in Iker Guarrotxena leh Sadaoui te goal hmangin chhanglet mah se Jamshedpur tan Harrison Sawyer-a'n chak nemnghehna goal a khung.