MCL khel tur Chanmarians leh Luangmual

Mizorama tualchhung cricket inelnaa ngaihhlut hlawh ber Mapuia Memorial Mizoram Cricket League puala club leh player lilamna chu Thawhṭanni zan khan Aijal Club-ah neih a ni a, Chanmarians CC leh Luangmual CC ten MCL an khel dawn.

Nuai 11 phawt

Kumin MCL-ah 1st Division League semifinalist pali Ramhlun Venglai CC, Zarkawt Lords CC, Kulikawn CC leh Gorkha CC te khel turin an tling. Hmun ruak pahnih dang lilam hmangin an hnawh khat.

Team slot hmasa zawk hi tualchhung club hlun engemaw zatin an inchuh hnuah Chanmarians CC in cheng nuai ngain an chhang. Team slot hnuhnung zawk hi Luangmual CC-in cheng nuai rukin an chang thung.

MCL dan angin team slot lei pahnihten player lilamna ṭan hmain an duh pahnih an thlang. Chanmarians in all-rounder Nasib Rai leh top order batsman B. Lalnunfela te an thlang.

Luangmual lamin state under 25 team rinrawl Jehu Anderson leh tawnhriat nei ṭha Lalhmangaiha te an thlang ve thung.

Lords an che na

Player lilamnaah club parukten an team tichak turin player 27 a belhkhawmin an lei. MCL khel lo tur club ṭha an awm nual, heng club aṭang hian player ṭha an lalut bawk.

Zarkawt Lords in player pasarih lakluh nan Rs 76,000 an seng. Club mal khaia player lalut tura sum seng hnem ber an ni. Chhinga Veng CC all-rounder Lalruatdika chu Rs 33,000-in an chhhang a, ani hi tun MCL auction-a player man to ber a ni.

Chanmarians CC in all-rounder K. Lalṭhazuala chu Rs. 28,000 in an lalut a, Luangmual-in Lalhruaitluanga lei nan Rs. 24,000 an seng ve bawk.

Team parukten player lakluh nana an sum hman belhkhawm hi cheng nuai 2.5 a ni.

Player leina 60% hi player-in an chang a, association leh an khelhna club-te hnenah 20% ve ve a lut ve bawk.

April 17 aṭangin

Kumin MCL hi April 17 aṭangin Suaka Cricket Ground-ah an khel ṭan dawn. Kuminah hian champion team-in cheng nuai thum an dawng dawn a, a belhkhawmin lawmmanah cheng nuai 12.75 sem ral a ni ang.

Nikum ang thoin kumin MCL hi Fancode kaltlangin live-in a en theih dawn a, awlsam taka application download-a subscribe turin App Store leh Playstore-ah te a awm a ni.