Milan mualah Napoli
Zanin dar 12:30 hian AC Milan chuan Champions League quarterfinal khel turin Napoli an lo mikhual dawn. Italian club ṭha pahnih hi Serie A lamah pawh boruak nei lian an ni a, pakhat zawk chuan UCL semifinal an lut ngei dawn.
An sulhnu en chuan Milan hi team ropui zawk an ni - Stefano Pioli naute hi Serie A champion lai an ni bawk. Mahse, tun season an hman dan chhut erawh chuan Naples club hi chak tura rinkai zawk an ni thung.
Milan hian hmanni lawk khan Napoli hi 4-0 in an sawp, an khelh fuh chuan Pioli naute hian Napoli hneh turin theihna an nei sang tawk tih a lang, league nomawi humhim beiseina a ral tluk a nih tawh avangin Champions League hi an ngaipawimawh zual hle dawn a ni.
Napoli an hneh hnu hian Empoli nen an inhnehtawk, he inkhelah hian Milan hian an player neih ṭhat ber an chhawr lo thung. Zaninah erawh Simon Kjaer, Rade Krunic, Brahim Diaz, Rafael Leao leh Olivier Giroud te chu bul ṭantu zingah an tel leh tawh ang.
Milan hian Tottenham Hotspur hnehin Champions League quarterfinal hi an lut a ni a, European football inelna sang berah hian kum 11 hnua a vawi khat nan a thiam zual pariat zingah an tel ve leh chiah, tun hma lama an ropuina ang kha neih let an tum dawn.
Tlarhma lamah Rafael Leao chu an innghahna leh rinrawl a ni leh dawn. Portuguese forward hian Serie A season kal laiah goal 10 a khung tawh; UCL-ah erawh goal khat chiah a la khung, inkhel boruak sang leh hautakah fiahin a awm ang.
Milan lak aṭanga Serie A nomawi chhuhsak mai tur Napoli hi an ṭhat dan berin an khel thei dawn lo. Striker ṭha leh rinawm Victor Osimhen chu hliam vangin a chawl mek - a khup hliam vangin Napoli match hnuhnung pahnihah a inlan thei lo a ni.
Nigeria international hi ram tana a feh chhuahna lamah a inhliam. Thawhṭanni thleng kha chuan team training pangngai a la zawm lo, tun season league goal 21 zet khung tawhtu hi a inlan lo a nih chuan Napoli tan a hmun ruak hnawhkhah a harsa khawp ang.
Osimhen bakah hian Giovanni Simeone chu hliam vanga chawl a ni bawk, ani pawh hian mimal chuan training nei tawh mah se team training pangngai a la zawm lo. Striker Giacomo Raspadori pawh a dam chiang lo nia sawi a ni, coach Luciano Spalletti tan a luhai thlak khawpin a rinawm.
A tawi zawnga sawi chuan Napoli hi tlarhma lamah an buai ru hle, an match hnunung pahnihah a lang tawh. Zaninah pawh Milan tlarhnung sut tlang an harsat mai thei, chutih rualin anmahni mualah second leg an la khel dawn, inkhel hmasa zawka goal chhuah loh an tum a pawimawh ang.