Sentea leh Peka ten Real Madrid hmachhawn dawn

June-July a khelh tur AFC Under-17 Asian Cup inbuatsaihna atan India U17 chuan Spain leh Germany an tlawh dawn a, nimin khan Spain an thleng.

Indian rawltharte hi Atletico Madrid club hmunhmaah an thleng a, Spain an cham chhungin Atletico bakah hian Real Madrid youth team chu friendly match an khelhpui tur zingah an tel.

India squad-ah hian Mizoram player pahnih, Vanlalpeka Guite (Sentea) leh Lalpekhlua te an awm a, Sentea hian captain dinhmun hial chelhin, Bawngkawn winger Peka pawhin hmun pawimawh a chang ṭhin.

Aizawl FC U15 tana khel tawh Sentea captain-na hnuaiah India hi AFC U17 Asian Cup khel tur hian an tling a, September, 2022 khan South Asian Football Federation U17 Championship-ah nomawi chawiin Sentea hi Most Valuable Player of the Tournament-ah thlan a lo ni tawh bawk.

Blue Tigers naupangte hian Spain-a friendly match an khelh zawhah Germany an pan dawn bawk a, May 16-ah Frankfurt, Germany panin, friendly match hnih an khel leh ang a, May 31-ah Asian Cup khel turin Thailand an pan tawh ang.

India U17 te hian La Liga club Atletico Madrid U16, second division club Leganes U18, Atletico U17, Real Madrid U17 leh Getafe U18 team te Spain-ah hian an hmachhawn dawn a ni.

Khawzawl rawlthar Sentea chuan, "A harsa viauin kan ring a, mahse, Pathian zarah kan inbuatsaihna a ṭha tawk," tiin Vanglaini a hrilh a, Spanish team ṭhate lakah an nep bik a ring lo.

AFC U17 Asian Cup khel tura inbuatsaih India hi group D-ah Vietnam, Uzbekistan leh Japan te nen an awm ho dawn a, team 16 inelin, group tina a sang pahnih zelin quarterfinal an lut ang.

Thailand-a khelh tur inelnaa semifinal lut chinin 2023 FIFA U-17 World Cup an khel dawn bawk a, India coach Bibiano Fernandes chuan, "India tana World Cup khel tura inpettling hmasa ber nih kan tum," tiin a lo sawi tawh - 2017-ah khan India U17 chuan World Cup khel mah se a thlengtu nih vanga World Cup hi khel an ni.