Foxes manager thar Smith

Leicester City chuan tun season tawp thlenga an team enkawl turin Dean Smith an lalut. Premier League aṭanga tla mai thei dinhmuna ding mek hi khai chhuah a tum dawn a ni.

Kum 52 mi Smith hian tun hmain Aston Villa leh Brentford te a enkawl tawh a, tun season tir lamah khan Norwich City enkawlin an ban. Tuna Foxes enkawl hi a tan chuan chona hautak tak a ni ngei ang.

Smith chuan, "Kan hmaa chona inchhawp leh tih tur awm chu kan hrechiang, keimah chauh ni loin ka coaching team hian hetiang hmachhawn tur hian tawnhriat kan nei tawh.

"Team chhunga player-te theihna ka hria a, khelh hmabak la awm kan zirchiang bawk. Season tharah Leicester City hian Premier League an khel chhunzawm ngei ang," tiin a inringtawk hle.

Foxes hian Premier League match 30 an khelh aṭangin point 25 an hmu a, an hnuaiah hian point 23 hmutu Southampton chiah an awm. A him china awm Everton nen an inthlauhna chu point hnih chiah a ni a, an tan kawng a la inhawng zau viau.