Villarreal player Alex Baena a hlauthawng

Real Madrid midfielder Federico Valverde-a'n kut a thlak nia an sawi, Villarreal winger Alex Baena chuan amah mai bakah a chhungte chuan thaha vauna an tawh thu a sawi a, Valverde nen an inkara thil thleng hi chu ti maiin a la tawp dawn lo, niin a lang.

Inrinni zan khan Real leh Villarreal hi La Liga match-ah an intawng a, 3-2 in Villarreal an chak - he inkhelah hian Baena hian Valverde chu a nupuiin nau a pai mek chungchangah ngeiawm takin a ṭawngkhum nia sawi a ni a, Valverde lungawi lo hian inkhelh zawhah lo changin, Baena hi a hnek a ni.

Valverde kawppui Mina Bonino chu rai mekin, a tirah nau hi ṭha taka an neih theih a beiseiawm loh thu doctor-ten an hrilh - tun hnuah erawh harsatna awm loa a hrin theih tur thu sawi a ni.

Mahse, hemi chungchang hi Baena chuan inkhelh laia sawi chhuakin, Valverde tihel nan ṭawngkam mawi lo tak a hmang. Valverde hian Baena hi inkhelh zawhah a lo chan tur thu a hrilh a, a sawi ang ngeia lo changin kut a thlak ta niin an sawi.

Baena hian January-a team pahnih intawn ṭum pawhin Valverde hi mawi lo takin a ṭawng khum tawh nia sawi a ni a, a tawpah chuan Madrid player hi a insum zo ta bik lo niin a lang.

Villarreal winger Baena chuan Valverde hming lam ri loin, "Real Madrid nen kan inkhelh zawh khan, he infiamnaa ka telpui ngei chuan kut min thlak a ni. Kha thil a thlen hnuah khan, a laina hnaite sawi ni ngeia langah, an chhungkua anchhia ka lawh ang hialin a thang," a ti a, mahse, a fiahna engmah a awm chuan loh thu a sawi bawk.

Baena chuan puh a nihna chu dawt a nih thu sawiin, "Thil thleng duhawm lo thupmawi nan vanduaina chu an hmang ṭangkai a, kut inthlak aia tawrh har zawk dawt hi chu a awm ve a ni. He thil avanga ka chhungte tawrhna hi tihziaawm a, sawi mawi theih a ni lo. Vauna leh hmuhsitna tam tak kan tawk a, ka chhungte thaha vauna thlengin a awm," a ti a, thil thleng chu police hnenah an report thu a sawi.

Hetihlai hian Villarreal chuan thuchhuah siamin, an player an thlawp tlat thu leh, an player thusawi an rin tlat thu an sawi a, Real leh Valverde te hian thuchhuah an la nei ve lo thung.

Valverde kawppui Mina Bonino erawhin twitter lamah Baena hi a chhang a, "Kan dinhmun duhawm lo (nau pai chungchang) tak avanga hlauthawng taka kan awm hnu a, chu chu thil ṭha lo thup mawi nana hmang anga puh nih chu hrehawm tak a ni.

"Ka rilru a na takzet a, engtiklai mahin tharum thawh hi kan thlawp ngai lo. Vauna an tawk pawi ka ti a, keini pawhin kan tawk tho - hei chu kan tih theih piah lam a ni," a ti a, Valverde a la ngawihna chhan chu an hun tawn hrehawm kha sawi nawn a duh tawh loh vang a nih thu a sawi bawk.