Robertson nghawktu chhawr zui dawn lo

English professional football-a official hna thawk intelkhawm pawl, Professional Game Match Officials Limited (PGMOL) chuan, Liverpool leh Arsenal inkhelh ṭuma Reds defender Andy Robertson nghawktu assistant referee Constantine Hatzidakis chu Football Association-in a chhui chhung chu official hna a thawh loh tur thu an sawi.

Pathianni zan khan Liverpool leh Arsenal chu Anfield-ah intawngin, 2-2 in an inhnehtawk a, he inkhelah hian first half a zawh khan Robertson chuan thinrim taka assistant referee Constantine Hatzidakis hi panin, a thutlukna ṭhenkhat a sawisel.

He thilah hian Hatzidakis hian a kiuin Robertson hi a lo nghawk niin a lang a, Robertson leh Reds player dang lungawi loten referee Paul Tierney pan zui mah se Liverpool left back Robertson hi yellow card pek a ni.

PGMOL chuan thuchhuah siamin, "PGMOL chuan FA-in Andy Robertson leh Constantine Hatzidakis inkara thil thleng chungchanga Hatzidakis a chhui chhung chu, PGMOL-in match a enkawl ṭhinah Hatzidakis hi a ruai rih lo ang," an ti a, an thawhpui chu an chawlhtir rih dawn.

Premier League, Champions League leh Europa League thlenga match tam tak lo enkawl tawhtu Hatzidakis hian a chet dan avangin dem a hlawh nasa a, FA hian engtiang takin nge an hrem dawn, tih chu thil hriat châkawm a ni.

Blackburn Rovers striker hlui Chris Sutton chuan, "Hrem a ni ngei tur a ni," a ti a, Premier League referee hlui Keith Hackett chuan, "A tih loh tawp tur a ti a ni," a ti bawk.

Premier League referee lar tak ṭhin Mark Clattenburg chuan, "Player chuan an lungawi lohna lantirin min pan fo a, a chang chuan tihlet mai a châkawm fo ṭhin. Mahse, a engti hawi zawng mahin kan chhanglet tur a ni lo a, tharum hmang ngat phei chuan kan ti tur a ni lo - Hatzidakis chuan a ti a, tunah chuan hrem a nih ngei duhtu an tam ang. Mahse, a nghawk luiah chuan ka la ngai thei lo," a ti ve bawk.