Barcelona-in goal an khung lo!
La Liga-ah point 15 ngawta hmahruai falna hun remchang nei mah se Barcelona-in an hun ṭha neih an chhawr lo a, Thawhṭanni zan khan league match-ah goal an khung lo - Nou Camp-a inkhel an ni!
Catalan club hian awlsam taka an hneh mai tura ngaih Girona chu an mikhual a, mahse, team pahnihin goal khung an harsat avangin 0-0 in an inhnehtawk - Barca tan point khata lungawi zir a ṭul.
Barca tana chanchin lawmawm erawh Villarreal-in Inrinni zana hna ṭha tak an lo thawhsak chu a ni a, Yellow Submarine hian Barca elpui ber Real Madrid chu 3-2 in an hneh.
Real an tlawm avang hian Barcelona hian point 13 ngawtin hma an la hruai fal tho a, Carlo Ancelotti naute nena an inthlauhna a la tam tham deuh avangin hlauhthawn viau tur niin a lang rih lo.
Lewy a nil
Robert Lewandowski leh goal khung loh hi thil inhmeh lo ang hiala chhal theih a ni a, mahse, Thawhṭanni zanah erawh he thil hi a thleng a, Polish striker-in Girona lakah goal a khung thei bik lo.
Lewy hian inkhel ṭan aṭanga minute lina lekah goal hmahruai khungna remchang a nei a, mahse, Raphinha-a siamsak chu kum 34 mi striker hian uiawm takin goal chungah chiah a thlawh.
Minute li a liam a, Barca bawk an hlauhawm nawn - Gavi-a'n Lewy tana a siamsak chu a na hret a, heta ṭanga ball kal hi Santiago Bueno chuan hawi chhuak miah loin goalkeeper Paulo Gazzaniga a pe let.
Fulham aṭanga loan-a Girona-in an hawh Gazzaniga hi a lo tlan chhuak si a, rang taka goal lamah tlan letin a pet chhuak hman. Girona an vannei takzet.
A hming Gazzaniga
Girona keeper Gazzaniga-a'n own goal tur ṭha takin a dang a, Argentina tana vawi khat inlan ve tawh keeper hi a hnuah pawh kan hmu ngun hle - Girona tan chhandamtu a ni a, Barca tan mangchhia thlentu a ni.
Barca tan Raphinha chuan minute 36-naah goal khungna chance duhawm zet nei mah se Gazzaniga bawkin a dang a, kum 31 mi keeper hian Brazilian forward goal khung ngei tur nia lang hi a kea dangin, corner a chawi.
Corner aṭanga ball kal hi Ronald Araujo chuan ṭha zetin pet leh mah se Gazzaniga bawkin a lo dang nawn a, Girona-in goal chhuah loin chawlhklawk an hman theih phah.
Second half-ah pawh Gazzaniga bawk a langsar a, hun tawp dawna Gavi khung tur nia lang a dansakte pawh pui tak a ni - Raphinha freekick aṭanga ball kal Eric Garcia khung loh pawh uiawm a tling a, Barca vanneih zan a ni lo.
An inthlau
Barca hian 59% zet ball changin, vawi 18 shot an nei a, heng zinga pathum hi target-ah kalin, a pawimawh ber goal erawh an khung lo - Catalan club-in goal an khung lo chungin inkhel an thunun tluan chhuak zak.
Hetihlai hian Girona pawh chance nei lo tawp an ni bik lo a, second half-a Taty Castellanos-a'n a hun ṭha neih a chhawr loh chu an thlirlet ang a, an ui vawng vawng ang.
Barcelona-in hnehna chang zo lo mah se thlamuang taka an awm zui a nih pawhin an demawm hran lo. Catalan club hian European football khelh tur an nei tawh lo a, Copa del Rey semifinal-ah Real an ngam lo bawk.
Hei vang hian league match kar lakah chawlh an ngah a, an match neih leh hmasak ber pawh April 16 zana Getafe an lenchilh tur chu a ni. Real aia hahdamin La Liga lamah rilru an sawr bing thei dawn - match 10 khelh hmabakah Atletico Madrid chu team hmachhawn hautak awmchhun an ni tawh bawk a, Barca tan nomawi chawi ngei beiseina a sang zel.