Palinaah Jabeur a kai sang

Hmeichhe tennis thuneitu sang ber Women's Tennis Association (WTA) chuan Thawhṭanni zan khan world ranking thar an ti chhuak, tun hnaia Charleston Open champion Ons Jabeur chu palinaah a inhlangkai.

Tunisian nula Jabeur hian season hmasa khan Wimbledon leh US Open final a lut a, mahse a champion lo zawkah a ṭang. Tun season tir lamah hliam vangin a buai, inelna lian Australian Open-ah pawh a thleng sang lo.

Mahse, a hliam dam hnuah hma a rawn sawn leh ta hle a, a tournament khelh hnuhnung berah hian champion lai Belinda Bencic hnehin a nomawi a chhuhsak a ni.

Jabeur hian a tawn san lai ber chu world number 2 dinhmun pawh a lo luah tawh, tunah erawh pangana aṭangin palinaah a kaisang, a chunga awm Caroline Garcia chu a nek chhuak leh rih a ni.

World ranking chung berah erawh Iga Swiatek a la awm chhunzawm. Poland nula hi Indian Wells hnuah a la inkhel leh lo, a khel bawr hliam vangin a chawl mek a, a lo kir hun tur sawi theih a la ni rih lo.