Red Bull an hremna a nep - Ferrari

Formula 1 season kal laia che ṭha tak Red Bull chet fuh chhan chu season hmasa lama pawisa an hman tam vangah Ferrari chuan an ngai a, nikuma dan an bawhchhiat avanga hremna an tawh chu nep an tih thu an sawi.

Red Bull hian sum hman phal chin aia tam an hmang a, hei vang hian pound maktaduai 6.07 chawitir an ni a, hei bakah hian zirbingna lama an hmalakna ṭhenkhat chu tih hniamsak an ni bawk.

Ferrari team principal Frederic Vasseur chuan, "Ka ngaihdan chuan nikuma hremna an tawh kha a nep em a ni, midang aia hma hreta kal duh chuan dan bawhchhiat a ngai a, chumi hremna chu a nat leh si loh chuan a fuh lo," a ti.

Red Bull hian tun hnai season hnih chu car intlansiakna sang ber an thunun hneh hle. An driver Max Verstappen a champion ve ve a, tun season an hman laiah pawh Red Bull hi team dangin an la umphak ve miah lo.

F1 team hlun Ferrari hian tun hma lama an ropuina ang neih let tumin tha an thawh nasa, mahse hun rei tak chhung Mercedes an tluk thei lo, tunah Red Bull hnuaia an awm leh tak avangin danglamna chu an mamawh tih a chiang.

Driver champion lai Verstappen-a'n Bahrain leh Australian GP-ah hnehna a chang a, amah ang bawka Red Bull car khalhtu Sergio Perez chuan Saudi Arabian GP-ah hnehna a chang ve thung a ni.

Tun season chhunga intlansiak palina atan April 30, Pathianni tlai dar 4:30 hian Azerbaijan Grand Prix an tlan leh ang. Team dang tan Red Bull elphak chu an tum tur hmasa a ni ang.