Clay court beiseitu Medvedev

Tennis an khelhna hmun hi a inang lo hlawm hle - hard, grass leh clay court te hi a ball kan dan a danglam a, player tinin inkhelh thiam bikna hmun an nei deuh zel, a vaia khel thiam pawh an awm tho.

Daniil Medvedev tan chuan clay court hi hmun duhawm a ni ngai lo. Russian tlangval hian tennis a khelh hun chhungin nomawi 19 a chawi tawh, heng zinga 18 hi hard court chunga a lak a ni, a inkhelh thiamna chu a chiang.

US Open 2021 nomaw a chawi a, hei hi hard court chungah a ni, hemi kum vek hian grass court inelna pakhat Mallorca Open-ah a champion a, hmun dangah a la champion miah lo.

Tun kar aṭanga khelh tur Monte Carlo Masters-ah Medvedev hi a inlan dawn, atan chuan hmun duhawm ber ni lo mah se tun season chu clay court-ah ṭha taka khelh a beisei thu a sawi.

World number 1 hlui Medvedev chuan, "Ka khelh dan phung ṭhenkhat chu ka tih danglam ngei a ngai dawn, chutiang a nih loh chuan ka khingpuite tan harsatna ka siam tam thei lo leh ang tih a hlauhawm.

"Chutihrualin, thawk leh khata khelh dan thlak danglam thut theih erawh a ni bik lo. Hard court lama ka khelh thiam dan kha tunah chuan ka herrem hret erawh a ngai dawn, ka nihna chu a bo chuang lo ang," a ti.

Tun season kal laiah Medvedev hian Rotterdam, Doha, Dubai leh Miami Open nomawi a chawi tawh, ani aia season hmang ṭha an awm bik lo ang - Monte Carlo Masters a khelh turah pawh rinkai a ni dawn.

Kum 27 mi Medvedev hi seeded pathumna pek niin, first round chu a khelh buai a ngai dawn lo. A match hmasa ber atan chuan Lorenzo Sonego leh Ugo Humbert inkhel a chak zawk a thum ang - Nilaini zanah a inlan ṭan dawn tihna a ni.

Monte Carlo-ah hian champion lai chu Stefanos Tsitsipas a ni. Greek tlangval hian a kum hnih chu a zawnin title hi a la, clay court inelna lian French Open inbuatsaihna a nih nghal avangin nomawi humhim ngei a

tum ang.