Tuchel-a'n Pep Guardiola thluak a chelh lo; Manchester City 3 - 0 Bayern Munich

Etihad Stadium-ah German club awm tawh zinga ropui ber Bayern Munich an lenglut a, tun hnaia English club ṭha ber Manchester City nen Thawhlehni zan khan an inhmachhawn. Club ropui pahnih inkhel ni ringawt loin manager ropui pahnih inbeihna a ni tel a, Champions League quarterfinal first leg-ah Thomas Tuchel-a'n Pep Guardiola thluak a chelh lo.

English champion hian German champion hi 3-0 in an hneh a, City tan Rodri, Bernardo Silva leh Erling Haaland ten goal khat ṭheuh an khung. Goal thum bakah hian City khelh dan nghet ṭha takin Pep-a ropuina a sawifiah.

Inkhel erawh a la tawp lo. Minute 180 khelh turah minute 90 chauh an la khel a, April 19, Nilaini zan hian Allianz Arena-ah second leg khelh a ni dawn. Away goal rule a awm tawh lo hi Etihad Stadium-a goal khat pawh khung lo Bayern tan lawmna tur a ni.

Game Plan chu

Thomas Tuchel-a'n Chelsea a enkawl ṭantirh khan Pep Guardiola kaihhruai Man City hi Premier League, FA Cup semifinal leh UCL final thlengin a hneh vek. Ruahmanna ṭha tak tak siam ṭhin Pep hian 2020-21 season chawhnu lamah khan a ṭul bakin ngaituahna a seng.

Premier League an thunun avangin season chawhnu lamah player a siksawi nasa a, Tuchel-a'n UCL final-a an khelh dan tur ruahmanna a hriat lawk lohna atana ti a ang ber. Mahse, final-ah meuh City-in khelh dan nghet an nei lo a, Pep-a tihsual langsar ber chu 'defensive midfielder' a chhawr lo. Bench-ah Rodri leh Fernandinho te an awm a, final-ah Tuchel-a kaihhruai Chelsea an khel ṭha zawk.

Kum hnih hnuah City hi an danglam ta hle. Pep-a'n final-a bul ṭantu Oleksandr Zinchenko leh Raheem Sterling te chu a hralh chhuak a, bench aṭanga lut Gabriel Jesus, Sergio Aguero leh Fernandinho te pawh an tel tawh lo.

Tun season-a Pep-a team danglamna chu Erling Haaland milin game plan an siam a, Joao Cancelo pawhin Bayern a pan phah hial. Tlarhnunga defender pawimawh Kyle Walker pawhin bench-ah hun a hmang ta zawk.

Pep-a'n Tuchel-a team a hmachhawn leh meuh chuan defensive midfielder pahnih a chhawr tawh a, pakhat chu khawvela defensive midfielder ṭha ber zinga mi Rodri niin pakhat leh chu chher chawp John Stones a ni.

Tlarhnungah defender pathum Ruben Dias, Manuel Akanji leh Nathan Ake te an awm a; Akanji leh Ake te hian Europe club lian chil an tih put phak a rinawm lo. Chutihrualin tlarhmaah goal khung thei bik Haaland a awm a, hemi thlawp tur hian Kevin de Bruyne bakah Bernardo Silva, Ilkay Gündogan leh Jack Grealish te an awm.

City hian formation thar an hmang thut a ni lo a; match hnuhnung pali RB Leipzig (7-0), Burnley (6-0), Liverpool (4-1) leh Southampton (4-1) an sawp ṭumin an hmang vek. Player-ten an khelh dan an bel tawh zawk.

A hmuhnawm e

English champion leh German champion inkhel a nih miau avangin beisei a sang a, beisei ang ngeiin a 'class' a sang bawk. Player tinin an tih tur an hria a, goalkeeper aṭanga pass chhuah ve ve an tum a, team pahnihin pressure sang tak taka an pek bawk avangin hmun thawl lai a awm zel.

City midfielder De Bruyne-a'n Bayern tlarhnung an ṭhiah theih nan ball sirah ball a pawt fo a, John Stones-a'n 'key pass' tia sawi tur nei lo mah se Rodri nen tlarhnung an puih ṭhat avangin tlarhma lamin duh thalin an nawr theih phah. Bayern ang thoin City tlarhmaten pressure an pe ṭha a, Bayern keeper Yann Sommer a chet muan hret avangin inkhelh ṭantirh lamah Haaland-a'n a thawhrim rah a seng teuh hle.

Inkhel pawimawhah player ṭha bik an inlar ṭhin a, Rodri-a'n Bayern tlarhnung phui ṭha tak paltlang kher loin hla tak aṭangin a pet goal a, inkhel kalhmang thlak danglamtu tiin a sawi theih. Bavarians hi an vanneih ṭum ni se, City goal khung hma hian Musiala ball pet mar ṭha zet chu Ruben Dias-a'n a dansak. A goal miau lo a, sawi zui tlak a ni ta lo.

Bayern player-te ball chan a nghet tawk lo a, heti chung hian tlarhnungah ball an inpe nasa. City-in an khelh dun dan an hriat chian laiin Tuchel-a khelh duh dan Bayern player-ten an la bel tawk lo. Hei bakah hian Robert Lewandowski a awm tawh lo a, a aiawhtu Eric Maxim Choupo-Moting a inhliam avangin no. 9 an nei lo. City defender-ten Bayern tlarhmaa awm Serge Gnabry an chep ral hneh hle.

Thomas Tuchel-a'n Julian Nagelsmann-a tlarhnung rem phui theih loh chu a la thawm phui thei chuang lo a, Man City-in minute 70-naah Bernardo Silva hmanga goal hnihna an khung avangin Bayern an tlu sawp. Bench aṭangin tawnhriat nei ṭha vek Sadio Mane, Joao Cancelo leh Thomas Muller te lut mah se German champion an insiamṭha thei lo.

Goal khung thei bik striker Haaland-a'n goal thumna a khung belh a, Bayern goalkeeper Sommer-a'n hun tawp lama a hna a thawh ṭhat zarah goal tam zawk an chhuah lo. Chutihrualin Sommer-a'n captain Manuel Neuer-a hmun ruak hnawh khah a harsat a, Germany no. 1 Neuer-a'n inringtawk taka tlarhnunga ball a sem ang ṭhin angin a sem ve thei lo.

Bayern an chesual?

Treble champion thei Bayern Munich-in an manager Julian Nagelsmann an ban a, Nagelsmann hnuaiah hian result ṭha ber nei lo mah se UCL quarterfinal thleng tur hian club lian Inter Milan, Barcelona leh PSG te ṭum hnih ṭheuh an hneh. Tuchel hnuaiah match li chauh an la khel chungin DFB Pokal aṭangin an tla tawh a, Champions League lamah pawh beisei a bo ta hle.

Tun ṭum hi March 13, 2019-a Bayern-in Niko Kovac hoa Allianz Arena-a Liverpool 3-1 a an hneh loh hnua an mualpho leh berah a ngaih theih a, hun tam zawkah City nen inhnehtawk mah se an chance neih dan thlirin English club hian 3-0 a chak an phu a, Pep-a'n game plan a nei ṭha zawk a tih theih bawk.

Tuchel-a'n Mr Bayern Munich ti hiala an sawi Thomas Muller bench-ah a dah a, captain hna chelhtu Joshua Kimmich-a'n a hna a tlin tawk lo. Rawlthar duhawm Jamal Musiala-a'n attacking midfield-ah beisei a pha lo a, Bayern tlarhnunga ding Upamecano chu hun pawimawhah a chesual a, a khaikhawmna chu Tuchel-a'n Bayern ṭhat dan ber a la hre lo. German manager hian minute 90 hun a la nei a, amaherawhchu an khingpui tur hi Pep Guardiola kaihhruai Man City an nih avangin Allianz Arena-ah pawh ni se thawhchhuah a harsa tawh khawp ang.