Benfica khelmualah Inter Milan an chak

Inelna hrang hrangah match ruk zet a zawna an chak zawh tawh loh hnuah Inter Milan an chak ve leh ta a, an chak hun pawh, "A hunah tak," tia chhal theih a ni - Champions League quarterfinal first leg a ni tlat.

Italian club hian Thawhlehni zan khan Portuguese club ṭha Benfica chu khualmualah an lenchilh a, 2-0 in an hneh. Serie A club tan Nicolo Barella leh Romelu Lukaku (penalty) ten goal khat ve ve an khung a, Benfica-in a chhanletna tur an nei lo.

Inter hian an ke lehlamin Champions League semifinal an rap ta, tiin a sawi theih a, Serie A lama beisei phak lo team fan-te tan chuan European football-a an result hi result lawmawm tawpthang a ni.

April 19 zanah Champions League quarterfinal second leg hi khelh leh tur a ni a, Inter khelmuala inkhel tur an nih avangin Italian club tan a thiam pali zinga tel turin dinhmun a ṭha ta hle.

Boruak sosang

Benfica khelmualah boruak a sosang ṭhin a, Lisbon khawpuia Estádio da Luz khelmualah pawh mipui 62,594 zet pungkhawmin, an team tan theihtawp chhuah an tum a, chak ngei duhin Italian club an mikhual.

Portuguese club hi Primeira Liga-ah point sarih ngawtin sang fal mah se an hmelma kumhlun FC Porto hneh lo hlim an ni bawk a, European football hmanga rilru na thawidam an châk vanglai tak a ni.

Mahse, Inter boss Simone Inzaghi a â duh bik lo a, fimkhur taka a naute rem chungin 3-5-2 formation a rawn hmang a, na taka nawr nghal pup pup ai chuan tlarhnung lam rem phui tel a pawimawh tih a hria.

Hetihrual hian chance nei hmasa zawk chu Benfica an ni a, minute 16-na lekah Rafa Silva chuan goal khungna remchang nei mah se Inter keeper Andre Onana chuan ṭha zetin a lo dansak.

A goal ta

Inter-in goal venhim an ngai pawimawh miau a, Benfica lamin Silva hnuah first half chhungin chance ang tak taka chhal ngam an nei meuh lo - Florentino Luis, Joao Mario leh Alex Grimaldo ten goal-ah 'try' vek mah se penalty box pawn aṭang vekin a ni a, Inter a tibuai phak lo.

First half chhungin target-a 'shot' vawi khat chiah a awm a, second half-ah erawh rin loh takin goal kan hmu hma thung - goal khungtu pawh tlarhnung lam ngai pawimawh Inter an ni.

Minute 51-naah centre back Alessandro Bastoni chuan duhthusama ṭhain Benfica penalty box-ah ball a thlawh lut a, kum 26 mi Barella chuan ball tauh thiam bik a ni tih pholangin, an hmahruaina goal ni turin a tauh lut.

Inter-in target-a shot an neih hmasak berah goal an khung nghal a, Benfica an vanduai - minute 56-na a ni a, Benfica an vanduai nawn. Inter penalty box-a buai nuai karah Bastoni chuan Gonçalo Ramos a kalh thlu niin lang mah se referee-in penalty spot a kawk tlat lo!

A tawpah Inter

Inter an fimkhur zui a, 5-3-2 a inher rem zuiin, full back pahnihin tlanchhuah an thupui vak tawh lo. Heti chung hian chance duhawm erawh an nei tho a, Henrikh Mkhitaryan-a khung ngei tura lang Benfica keeper Odisseas Vlachodimos-a'n a dante chu pui tak a ni.

Hei hi a tawpna a la ni lo - minute 81-na a ni a, Inter-in penalty an hlawh chhuak. Italian club player hlui, Benfica player pawimawh Joao Mario chuan Denzel Dumfries ball cross tur dan a tumna lamah a kut a phar chhuak a, ball-in a kut a per.

Referee Michael Oliver chuan thil thleng hi khelmual sirah a ennawn a, sawisel theih tak ni mah se penalty pek a thlang zawk. Bench aṭanga luhtir Lukaku a lo pen chhuak a, goal-ah a chantir zui.

Benfica tan Ramos chuan hun pek belhah chance duhawm nei mah se Onana tana dan harsa lo turin a pet a, hun tawp thlenga goal dang lut loin mahni mualah an tlawm - Benfica an vanduai takzet.

"Mahni muala 2-0 a chak loh chu thil ṭha lo tak a ni a, mahse, tunah chuan halftime ang chauh a la ni. Ṭha taka tih chang kan nei a, chutihrual chuan penalty chungchangah kan vanduai ve bawk - penalty vawi hnih tal chu hmu ve thei pawh kan ni a, mahse, hei hi football chu a ni tlat si."
- Roger Schmidt,
Benfica boss

"Tun hnaiah kan result ṭha loin, beisei phak lo deuh ṭhin mah ila, chance vawi tam kan insiam ṭhin tho avangin Benfica laka chak kha ka beisei tlat reng a ni. Khelmual ropui tak leh khelh harsatna hmunah ṭha takin ka naute an khel thei - mahse, inkhel a la tawp lo tih kan hria. Benfica hian game ṭha tak khawiah pawh an khel thei tih an pholang fo tawh a, semifinal lut tur chuan khelh ṭhat chhunzawm a ngai ang."
- Simone Inzaghi,
Inter Milan coach