Chelsea-ah Chilwell a cham zel dawn

Premier League team Chelsea talbuai viau mah se defender Ben Chilwell-a'n khawdang hawisan a tum lo a, London club tana kum 2027 thleng khelh chhunzawm turin contract thar a ziak.

Kum 26 mi full back hi a contract hmasa ang chuan Stamford Bridge-ah kum 2025 thleng cham tur a ni a, mahse, kum hnih dangin London club-a a cham hun chhung tur hi a pawtsei ta a ni.

Chilwell hian kum 2020 khan Leicester City aṭangin Blues hi pound maktaduai 45-in a zawm a, kar khatah £180,000 bawr vel a hlawh anga sawi niin, a contract tharah chuan kar khatah £200,000 a hlawh phak dawn niin khawthlang media-ten an tarlang.

Chilwell chuan, "Chelsea hi nuam ka tiin, he hmuna ka hun hmante hi a hlimawm ka ti. Club-in an hmachhawpa min telh ve hi a lawmawm ka ti a, ka contract ka pawtsei thei hi ka hlim takzet," a ti a, Stamford Bridge-a a cham thei chu a lawm thu a sawi.

He thu hi Manchester City tan erawh rimawi a ni lo ang. Pep Guardiola enkawl team hian Chilwell hi an duh nia sawi a ni a, Joao Cancelo thlaktu atan an duh, tih thlenga sawi awm mah se Chelsea-a khelh chhunzawm a thlang.

England tana vawi 18 inlan tawh Chilwell chuan, "Hlawhtlinna chang turin kan thawkrim em em a, he hmuna nuam ti taka ka awm theihna tura min lo lawmtu fan-te hlimna thlen turin ka theihtawp ka chhuah zel ang," a ti.

Foxes chherchhuah Chilwell hian Chelsea a pan hnuah inelna hrang hrangah match 80 khelhsakin, goal kua a khungsak tawh a, assist vawi 12 a nei bawk.

English defender hian tun season-ah inelna hrang hrangah match 25 khelin, goal hnih a khung bakah assist vawi li a nei tawh bawk a ni.