Zaninah Inter Branch TT inelna semifinal

Central YMA leh Mizoram Table Tennis Association (MTTA) buatsaih LBS Suzuki 4th Inter Branch YMA Table Tennis Tournament 2023-ah a ruh no an chhuak zel a, zanin dar 6:00 aṭangin Hawla Indoor Stadium-ah team inelna semifinal khelh a ni dawn a, LPS HD Channel 13 leh CYMA YouTube Channel-ah live a ni ang.

Vawiin chawhnu lamah mipa singles round of 128 leh hmeichhe singles round of 32 khelh ṭan hman beisei a ni bawk

Rinkai Armed Veng

Hmeichhe inelnaah Mizoram no. 1 Lalthansangi Sailo (Teboihi) leh Mizo TT legend tia chhal theih Lalbiaknii te telna Armed Veng chu champion rinkai an ni a, New Serchhip Bazar tan Armed Veng hneh tur chuan thil mak a thlen a ngai ang.

Semifinal pakhat zawkah Bazar Venglai Lunglei leh Mission Vengthlang te erawh intum tawk tura ngaih an ni. Bazar Venglaiin womens singles champion tawh Vanlalnghaki leh Lalrinawmi te an kawl a, MSVT-in womens singles no. 2 ni lai Malsawmtluangi leh junior player ṭha Jenny Liansangpuii te an nei thung.

Hmeichhe inelnaah hian Corbillon Cup System a hmang a, hmeichhe pahnih lek an awm pawhin team an tlin. Best of five a khelh tur niin singles vawi hnih zawhah doubles khelh tur a ni a, chak zawk an la awm lo a nih chuan singles vawi hnih khelh leh tur a ni.

Final-ah MSV leh MSVT?

TT thiamna veng Mission Veng YMA-in Alberto LR Ruata an kawl a, Mizoram singles champion tawh C. Lalmuanpuia leh Lalmalsawma te an nei bawk. Chutihrualin Tuikhuahtlangin PSPB Academy-a awm tawh John Zamliana an kawl a, Mizoram aiawha kal fo tawh Ramduhsanga leh veteran player ṭha Lalngaihnatawma an nei bawk.

Mipa inelnaah hian New Swaythling Cup System hman a ni a, hmeichhe khelh dan nen a inlan lohna chu match thumna hi singles thoin khelh a ni. Mipa inelnaah player pathum awm a ngai a, no. 1 leh no. 2-in singles match hnih an khel thei. TKT tan MSV hneh tur chuan John-a'n Alberto a hneh theih a ngai dawn.

Nursery leh Mission Vengthlang ten semifinal hnuhnung zawk an khel dawn. Nursery innghahna tur chu Thangsiansanga leh a u Khamlianthanga te a ni ang a, amaherawhchu MSVT hi team angin an ṭha zawk. MSVT hian national U17-a silver medal la pha H. Lalruatsanga bakah player ṭha dang Zorema Pachuau, H. Lalṭanpuia leh Robert Pachuau te an nei tlat.