Clay court-ah Djokovic a chak

United States lamah inkhel thei lo mah se Europe khawmualpuiah erawh a duh tawkin Novak Djokovic a inkhel thei. Serbian star hi Monte Carlo Masters-ah a inlan a, a match hmasa berah nuamsa takin hnehna a chang.

Thawhlehni zan inkhelah Djokovic hian Ivan Gakhov chu 7-6 (7-5), 6-2 in a hneh, a match lehpekah chuan Luca Nardi leh Lorenzo Musetti inkhela chak zawk a hmachhawn leh dawn a ni.

Grand Slam vawi 22 champion tawh Novak hian hripui leng laka invenna a lak loh avangin Indian Wells leh Miami Open a khel thei lo. March thlatira khelh zawh tak Dubai Tennis Championship hnuah tun ṭum hi match a khelh lehna hmasa a ni hial.

Monte Carlo Masters vawi hnih champion tawh Djokovic chuan, "Tun ṭum chu tennis nunrawnna lai a lang niin ka hria, ka khelh ṭhat ber ni a nih loh bakah tihsual ka ngah, chak phu lo zawkin hnehna ka chang.

"A pumpui thlir erawh chuan ka lawm hle, ka tan chuan rei tak tournament khelh hnua inelna hmachhawn ve leh chauh chu a awlsam lo ve bawk a ni," tiin a sawi a, a khelh ṭhat lo nia hnehna a chang hram chu a lawm hle.

Inkhel dangah Alexander Zverev a chak. German tlangval hian Alexander Bublik chu 3-6, 6-2, 6-4 in a hneh. Season hmasa French Open semifinal-ah Zverev hi na takin a inhliam a, chumi hnuah chuan tun ṭum hi clay court bika a inkhelh lehna hmasa a ni.

Seeded 13-na Zverev chuan, "Bublik-a khan min nawr buai hneh khawp mai, a nihna tak sawi chuan ka duh leh beisei angin min khelh tir thei miah lo," tiin a sawi, hnehna chang tur hian winners vawi 21 a vaw chhuak.

Grigor Dimitrov chuan Ben Shelton chu 6-1, 3-6, 6-3 in a hneh ve thung. Kum 20 mi Shelton hian Monte Carlo Masters hi a vawi khat khelhna a ni a, hnehna chang lo mah se player tawnhriat ngah laka a khelh dan kha lawmna tur a ni ang.

Champion lai Stefanos Tsitsipas chu Benjamin Bonzi nen an inkhel a, set khatnaah Greek tlangval hian 4-1 in hma a hruai a, a khingpui hi hliam vangin a inkhel chhunzawm thei tawh lo, kuminah hian a zawna a vawi thum nan champion a tum dawn a ni.

Monte Carlo Masters aṭang hian hliam vangin Rafael Nadal, Carlos Alcaraz leh Felix Auger-Aliassime te chu an lo inhnukdawk tawh a ni.