Super Cup-ah Mizo hming a mawi

Hero Super Cup chu Thawhlehni zan khan khelh chhunzawm a ni a, Mizo pathumin goal an khung. Inkhel hmasa zawkah Mumbai City chuan 2-1 in Churchill Brothers an hneh a, Lallianzuala Chhangte chuan Mumbai club chakna goal a khung.

NorthEast United tan Rochharzela leh Laldanmawia Ralte te chuan goal khat ve ve khung bawk mah se an team chu hnehna an chanpui zo lo a, Chennaiyin lakah 4-2 in an tlawm.

Payyanad Stadium, Manjeri-ah Mumbai leh Churchill intawngin, Goan club tan Ansumana Kromah chuan goal hmahruai a khung - mahse, Indian player hlanga khel Mumbai tan Mehtab Singh chuan minute 27-naah si phurh a sut a, Lianzuala chuan hun pek belhah chakna goal a khung zui bawk.

Lianzuala chuan, "Indian hlang ni mah ila, ka rin aia ṭhain kan khel thei a, ISL team kan tawn hunah kan nihna tak a hriat lehzual ang. Khua a lum em avangin duh angin a khelh theih meuh lo a, khel chhia inti hran lo mah ila, hmasawnna tur ka la nei - chance ṭha dang pahnih ka neih kha ti goal ila chu, ka lawm lehzual ang," tiin Vanglaini a hrilh.

He inkhelah hian Mumbai midfielder Lalengmawia Ralte (Apuia) chu minute 64-naah ke rêk hliam vangin lakchhuah a ni a, Apuia chuan, "A hlauhthawnawm hran lo. Ka inhliam tirh khan ka rap ngam lo a, kha vang khan ka chhuak a ni.

"Mahse, la endik leh tur a ni a, ka chawlh chen tur ka chiang lo," tiin Vanglaini a hrilh a, a dam leh vat a beisei thu a sawi bawk.

Thawhlehni zan inkhel hnuhnung zawkah Chennaiyin tan Rahim Ali leh Edwin Vanspaul-ten minute 35 hmain goal hnih an khung a, Highlander beiseina siam turin Chhara'n minute 42-naah a chhang let.

Mahse, Chennaiyin hian German midfielder Julius Düker leh Rahim Ali hmang bawkin an khung leh a, 4-1 a ni. Minute 73-naa luhtir, Sialhawk Express Danmawia'n a team mualpho lutuk tur ngai ngam loin, hun pek belhah khung ve leh mah se awmzia a nei thui lo a, 4-2 in Guwahati club an tlawm.

NorthEast forward Chhara chuan, "Chak kan harsat tlat a, hriatthiam pawh hi a harsa tawh zawk a ni," a ti a, Chhinga Veng tlangval chuan sawi zawmin, "Season khatah coach pathum laiin min enkawl tawh a, game plan a inang lo zel bawk si a, duh angin season a hman theih loh.

"Chutih lohah chuan, Pathian zarah hliam nei miah loin season ka tluan dawn niin a lang a, keimahah chuan ka lawm khawp mai," tiin a season hman dana a lawm tawk thu Vanglaini a hrilh.